ԵՐԵՎԱՆ, 25 նոյեմբերի – Sputnik. Արդեն մի քանի ամիս է, ինչ Հայաստանում ակտիվորեն քննարկվում է ՀՀ քննչական կոմիտեի ներկայացրած համաներման նախագիծը։ Դրանով առաջարկվում է համաներում շնորհել Արցախում մարտական գործողությունների մասնակիցներին, որոնք մեղադրվում են, կասկածվում են կամ արդեն դատապարտվել են մինչև 2020 թվականի սեպտեմբերի 27-ը կատարած հանցագործությունների (ոչ ծանր) համար:
Նախագիծը նաև համաներում է նախատեսում այն անձանց նկատմամբ, որոնք կատարել են կամ կասկածվում են զինվորական ծառայության հանցագործությունների կատարման համար 2020թ. նոյեմբերի 9-ից մինչև 2021 թվականի մարտի 24-ն ընկած ժամանակահատվածում, երբ վերացվել է ռազմական դրությունը:
Նախագիծը ներկայացվել էր հանրային քննարկման ս.թ. օգոստոսի 23-ից մինչև սեպտեմբերի 7-ը։
Արդարադատության նախարարության իրավական նախագծերի տեղեկատվական հարթակում (e-draft.am), որտեղ հրապարակվել է նախագիծը, որոշ քաղաքացիներ հանդես են եկել համաներման ենթակա անձանց շրջանակը ընդլայնելու կամ ևս մեկ համաներում հայտարարելու առաջարկով:
«Շատ երկրներում համաներումը հայտարարվում է Սուրբ ծննդյան կամ պետական տոների նախաշեմին, տարածվում է մեկ-երկու տարուց ավելի անազատության մեջ գտնվող և այդ ընթացքում օրինակելի վարք դրսևորած բոլոր կալանավորների վրա: Հետևաբար, անհրաժեշտ է մարդասիրություն ցուցաբերել և ավելի մեծ թվով բանտարկյալների ներգրավել այդ գործընթացում»,-կարծում են մի շարք քաղաքացիներ։
Քաղաքացիների առաջարկություններն ընդունվել են ի գիտություն, սակայն թե ինչպես դրանք կանդրադառնան նախագծի վրա, դեռ հայտնի չէ։ Ներկայում ընթանում է ստացված առաջարկությունների և դիտողությունների ամփոփման գործընթաց՝ այնուհետև նախագիծը կառավարությանն ու խորհրդարանին ներկայացնելու համար:
Միաժամանակ, մամուլում տեղեկություններ են հայտնվել այն մասին, որ ՀՀ արդարադատության նախարարությունն ու քննչական կոմիտեն համաներման մասին նոր նախագիծ են մշակում։
Sputnik Արմենիա գործակալությունը գրավոր հարցումով դիմել է այդ գերատեսչություններին՝ պարզելու` արդյո՞ք իսկապես համաներման ևս մեկ նախագիծ է մշակվում (բացի օգոստոսի 23-ին ներկայացվածից): Ի պատասխան քննչական կոմիտեից հայտնեցին, որ նախնական նախագիծը սեպտեմբերի 15-ին ուղարկվել է արդարադատության նախարարություն՝ կառավարության աշխատակազմին ներկայացնելու համար։
«Ներկայում արդարադատության նախարարությունում համաներման մասին որևէ այլ նախագիծ չկա»,-հայտնեցին նախարարությունից։
Նշենք, որ վերջին անգամ Հայաստանում համաներում հայտարարվել է 2018թ․-ին։ Քրեակատարողական հիմնարկներում պահվող 2888 կալանավորներից ազատվել են 270-ը։ Կրճատվել է 396 կալանավորի (21,5%-ի) պատժաժամկետը։ Պատժի կրումից ազատվել է 2720 մարդ՝ 3850-ից (պատիժն ազատազրկման հետ կապված չի եղել)։ Քննչական կոմիտեն փակել է հետաքննության փուլում գտնվող 6140 գործերից ավելի քան հազարը։