ԵՐԵՎԱՆ, 22 նոյեմբերի – Sputnik. ՀՀ երրորդ նախագահ Սերժ Սարգսյանին առաջադրված մեղադրանքը բացարձակապես շինծու է։ Լրագրողների հետ զրույցում նման կարծիք հայտնեց ՀՀԿ ԳՄ անդամ Էդուարդ Շարմազանովը` անդրադառնալով գործարար Սիլվա Հակոբյանի ցուցմունքով Սարգսյանին մեղադրանք ներկայացնելու փաստին։
Սարգսյանի փաստաբան Ամրամ Մակինյանը Facebook–ի իր էջում գրառում էր արել և հայտնել` Սարգսյանին կանչել են հարցաքննության որպես մեղադրյալ։
«Սա հերթական խղճուկ մեղադրանքն է, և սրանով իշխանությունը հասարակության ուշադրությունը շեղում է Սյունիքի շուրջ տեղի ունեցող գործընթացներին։ Սերժ Սարգսյանը չի վախենում ո՛չ ձերբակալվելուց, ո՛չ բերման ենթարկվելուց, ո՛չ կալանավորվելուց։ Եթե դա կօգնի Սյունիքի ու Արցախի հայկական լինելուն, նա բազմիցս նշել է, որ պատրաստ է»,–ասաց Շարմազանովը։
Նրա խոսքով` այս ամենը ևս մեկ անգամ ցույց է տալիս, որ իշխանությունը չի սպասարկում ՀՀ շահերը։
Հիշեցնենք, որ Սերժ Սարգսյանի պաշտպան Ամրամ Մակինյանն ասել էր, թե 3.5 տարի Սիլվա Համբարձումյանի ցուցմունքը վերցնել-դնելով` այսօր «որոշել են», որ նա նաև Սերժ Սարգսյանին է կաշառք տվել։ Փաստաբանն ընդգծել է, որ մնացած մանրամասներն առաջիկայում կներկայացնի։
Գործարար Սիլվա Համբարձումյանը դեռևս 2018 թվականին հրավիրված ասուլիսի ժամանակ ՀՀ նախկին նախագահներ Ռոբերտ Քոչարյանին և Սերժ Սարգսյանին մեղադրել էր կաշառք վերցնելու մեջ (Քոչարյանի նախագահության օրոք)։
Նա ընդգծել էր, որ խոսքը հանքարդյունաբերական ընկերության 100% բաժնետոմսերը արաբական շեյխերից մեկին վաճառելու մասին է։ Գործարքի գումարը 40 մլն դոլար էր կազմել։