ԵՐԵՎԱՆ, 22 նոյեմբերի – Sputnik. ՀՀ երրորդ նախագահ Սերժ Սարգսյանին կանչել են հարցաքննության որպես մեղադրյալ։ Այս մասին Facebook-ի իր էջում հայտնել է Սարգսյանի փաստաբան Ամրամ Մակինյանը։
«3.5 տարի Սիլվայի (Սիլվա Համբարձումյան, – խմբ.) ցուցմունքը վերցնել-դնելով, այսօր «որոշել են», որ նա նաև Սերժ Սարգսյանին է կաշառք տվել, և դա այն դեպքում, երբ նույն գործով դեռևս երկու տարի առաջ Սերժ Սարգսյանը հարցաքննվել է որպես վկա և մինչ օրս որևէ նոր հանգամանք իրավական առումով չի փոխվել և չի ավելացել»,– գրել է Մակինյանը։
Նա նշել է, որ ծանուցումը ստացել է հակակոռուպցիոն կոմիտեի քննչական երրորդ վարչության պետ Հրաչյա Մուշեղյանից։
Նա ընդգծել է, որ մնացած մանրամասներն առաջիկայում կներկայացնի։
Հիշեցնենք, որ գործարար Սիլվա Համբարձումյանը դեռևս 2018 թվականին հրավիրված ասուլիսի ժամանակ ՀՀ նախկին նախագահներ Ռոբերտ Քոչարյանին և Սերժ Սարգսյանին մեղադրել էր կաշառք վերցնելու մեջ (Քոչարյանի նախագահության օրոք)։
Նա ընդգծել էր, որ խոսքը հանքարդյունաբերական ընկերության 100% բաժնետոմսերը արաբական շեյխերից մեկին վաճառելու մասին է։ Գործարքի գումարը 40 մլն դոլար էր կազմել։