ԵՐԵՎԱՆ, 22 նոյեմբերի – Sputnik. ՀՀ ԱԺ փոխնախագահ Իշխան Սաղաթելյանը Սիրիայի Արաբական Հանրապետության արտակարգ և լիազոր դեսպան Մոհամմեդ Հաջ Իբրահիմի հետ հանդիպմանը անդրադարձել է տարածաշրջանում Թուրքիայի ապակայունացնող դերակատարությանը, ինչպես նաև տարածքային ամբողջականության դեմ այդ պետության ոտնձգությունների անթույլատրելիությանը:
Տեղեկությունը հայտնում են ՀՀ ազգային ժողովի մամուլի ծառայությունից։
«Սաղաթելյանը կարևորել է միջազգային խորհրդարանական հարթակներում Հայաստանի և Սիրիայի համագործակցությունը: Դեսպանն իր հերթին կարծիք է հայտնել, որ Թուրքիայի քայլերն ամբողջությամբ ուղղված են տարածաշրջանի կայունության դեմ: Նա մերժելի է համարել այդ երկրի կողմից վարձկանների ու ահաբեկիչների ներգրավումը պատերազմական գործողություններին, ինչպես դա տեղի ունեցավ 44-օրյա պատերազմում»,– ասվում է հաղորդագրության մեջ:
Իշխան Սաղաթելյանն ու Մոհամմեդ Հաջ Իբրահիմը կարևորել են երկկողմ բարեկամական ու եղբայրական հարաբերությունների խորացումն ու ընդլայնումը։
Անդրադարձ է եղել տնտեսական հարաբերությունների խորացմանն ուղղված քայլերի իրականացմանը, մասնավորապես՝ արտահանման և ներմուծման ծավալների ավելացմանը: Ընդգծվել է սիրիահայերի զգալի դերակատարությունը երկրի հասարակական-քաղաքական կյանքում: