ԵՐԵՎԱՆ, 22 նոյեմբերի – Sputnik. «5165» շարժման առաջնորդ Կարին Տոնոյանը Հանրապետության հրապարակում շարունակվող բողոքի ակցիայի ժամանակ ասաց, որ վաղվանից ընդդիմադիրները «հատ-հատ գնալու են բուհեր»։
«Հատ առ հատ գնալու ենք բոլոր բուհեր՝ ուսանողների հետևից։ Այդ ուսանողներն էին, որ օգնեցին, որ այս կործանարար իշխանությունները գան իշխանության։ Ուրեմն հիմա պետք է օգնեն մեզ, որ մեր երկիրը ազատենք», - ասաց Տոնոյանը։
«5165» շարժման առաջնորդի խոսքով՝ ընդդիմադիրներն ամեն օր հավաքվելու են Հանրապետության հրապարակում` մինչև այն «լցվի»։
«Մենք գիտենք, որ միայն լիքը հրապարակն է հարց լուծում», - վստահեցրեց Տոնոյանը։
Հիշեցնենք՝ բողոքի մասնակիցները պահանջում են կառավարությանը գաղտնազերծել դեկտեմբերի 15–ին ստրագրվելիք փաստաթղթի բովանդակությունը և ադրբեջանական կողմին միջանցքներ կամ տարածքներ չտրամադրել։
Հիշեցնենք` նոյեմբերի 18-ն Փաշինյանը հայտարարել է, որ Ռուսաստանի պաշտպանության նախարարությունը հանդես է եկել հայ-ադրբեջանական սահմանի դելիմիտացիայի ու դեմարկացիայի նախապատրաստական փուլի վերաբերյալ առաջարկություններով, որոնք վարչապետի խոսքով «ընդունելի են Հայաստանի համար»։
Նոյեմբերի 20–ին նաև պարզ դարձավ, որ Երևանը համաձայնություն է տվել դեկտեմբերի 15-ին Բրյուսելում Հայաստանի վարչապետ Նիկոլ Փաշինյանի և Ադրբեջանի նախագահ Իլհամ Ալիևի հանդիպման անցկացմանը: