ԵՐԵՎԱՆ, 20 նոյեմբերի – Sputnik. ԱՄՆ նախագահի ազգային անվտանգության հարցերով խորհրդական Ջեյք Սալիվանն իր թուրք գործընկեր Իբրահիմ Քալինի հետ միջազգային խնդիրներ է քննարկել, այդ թվում ՝ Հարավային Կովկասում տիրող իրավիճակը: Տեղեկությունը հրապարակվել է Սպիտակ տան կայքում։
«Նրանք կարծիքներ են փոխանակել տարածաշրջանային մի շարք հարցերի շուրջ` ներառյալ Ուկրաինայի, Աֆղանստանի, Սիրիայի և Հարավային Կովկասի իրադարձությունները, ինչպես նաև քննարկել են Միջերկրական ծովի արևելյան տարածաշրջանի կայունության պահպանման կարևորությունը», - ասված Է հաղորդագրության մեջ:
Սպիտակ տունն այլ մանրամասներ չի ներկայացնում։
Հիշեցնենք, որ հոկտեմբերի վերջին Հռոմում G20-ի գագաթնաժողովի շրջանակում կայացել էր ԱՄՆ–ի և Թուրքիայի նախագահներ Ջո Բայդենի և Ռեջեփ Թայիփ Էրդողանի հանդիպումը: Բանակցությունների ընթացքում կողմերը քննարկել էին Սիրիայի քաղաքական գործընթացը, աֆղանցիներին հումանիտար օգնություն հասցնելը, Լիբիայի ընտրությունները և Հարավային Կովկասում խաղաղություն հաստատելու հարցը։