ԵՐԵՎԱՆ, 18 նոյեմբերի – Sputnik․ Ռուսաստանի արտգործնախարար Սերգեյ Լավրովն ու ԵԱՀԿ գործող նախագահ, Շվեդիայի արտաքին գործերի նախարար Անն Լինդեն վաղը` նոյեմբերի 19–ին, Մոսկվայում կքննարկեն Լեռնային Ղարաբաղում իրավիճակի կարգավորման ուղղությամբ ԵԱՀԿ աջակցությանը վերաբերող հարցեր։ Տեղեկությունը հայտնում է ՌԴ արտաքին քաղաքական գերատեսչության մամուլի ծառայությունը։
«Ենթադրվում է անդրադառնալ Լեռնային Ղարաբաղի և Մերձդնեստրի հակամարտությունների կարգավորմանը ԵԱՀԿ-ի կողմից աջակցելուն վերաբերող հարցերին, ինչպես նաև Անդրկովկասում անվտանգության և կայունության վերաբերյալ ժնևյան քննարկումներում կազմակերպության միջնորդությանը: Քննարկել նրա հնարավոր դերը Աֆղանստանում ճգնաժամի հետևանքով տուժած Կենտրոնական Ասիայի պետություններին օժանդակելու գործում, որը 2003 թվականից ունի համագործակցության գծով ԵԱՀԿ-ի ասիական գործընկերոջ պաշտոնական կարգավիճակ»,- նշված է հաղորդագրության մեջ։
Մտքեր կփոխանակվեն եվրաանվտանգության ոլորտում ստեղծված իրավիճակին, Եվրոպայում սովորական սպառազինությունների վերահսկման ռեժիմի աշխուժացման ուղիներին և վստահության ու անվտանգության ամրապնդման միջոցներին վերաբերող հարցերի վերաբերյալ։
Նշենք, որ սա կլինի ԵԱՀԿ գործող նախագահի պաշտոնում Անն Լինդեի երկրորդ աշխատանքային այցն այս տարվա ընթացքում։