ԵՐԵՎԱՆ, 18 նոյեմբերի -Sputnik. Ռուսաստանը Աֆղանստանից տարհանում է ոչ միայն իր քաղաքացիներին, այլև ՀԱՊԿ անդամ մյուս պետությունների քաղաքացիներին: Ինչպես տեղեկացնում են ռուսական լրատվամիջոցները, այս մասին հայտարարել է Ռուսաստանի նախագահի մամուլի քարտուղար Դմիտրի Պեսկովը` պատասխանելով այն հարցին, թե ինչով է պայմանավորված ռուսաստանցիների Աֆղանստանից տարհանելու որոշումը։
«Դրանք այն քաղաքացիներն են, որոնք ցանկացել են լքել Աֆղանստանի տարածքը՝ հաշվի առնելով, որ այնտեղ շատ անհանգիստ է իրավիճակը», – հավելել է Պեսկովը:
Ավելի վաղ ՌԴ ՊՆ-ից հայտնել էին, որ ռազմատրանսպորտային ավիացիայի ինքնաթիռներով Աֆղանստանից դուրս կբերվի ավելի քան 380 մարդ՝ Ռուսաստանի Դաշնության, ՀԱՊԿ անդամ պետությունների (Հայաստանի, Բելառուսի, Ղրղզստանի), ինչպես նաև Ուկրաինայի և Աֆղանստանի քաղաքացիներ:
Աշխատանքը կազմակերպել է ՌԴ պաշտպանության նախարար Սերգեյ Շոյգուն՝ նախագահ Վլադիմիր Պուտինի հանձնարարությամբ:
Օգոստոսի սկզբին թալիբները սկսեցին հարձակումը Աֆղանստանի կառավարական ուժերի վրա, օգոստոսի 15-ին նրանց հաջողվեց մտնել Քաբուլ։ Հաջորդ օրն արդեն նրանք հայտարարեցին, որ պատերազմն ավարտված է: Օգոստոսի լույս 31-ի գիշերը ամերիկացի զինվորականները լքեցին Քաբուլի օդանավակայանը՝ վերջ դնելով Աֆղանստանում ԱՄՆ-ի գրեթե 20-ամյա ռազմական ներկայությանը։ Սեպտեմբերի սկզբին հայտարարվել էր Աֆղանստանի ժամանակավոր կառավարության կազմը, որը գլխավորում է Մոհամադ Հասան Ախունդան:
«Թալիբանը» ահաբեկչական գործունեության համար գտնվում է ՄԱԿ-ի պատժամիջոցների ներքո: