ԵՐԵՎԱՆ, 17 նոյեմբերի – Sputnik. «Հայաստան» դաշինքը չի բացառում, որ կհրաժարվի մանդատներից, երբ պահը հասունանա։ Այս մասին այսօր ասուլիսի ժամանակ հայտարարեց «Հայաստան» խմբակցության անդամ Աղվան Վարդանյանը։
«Ոչ միայն Թագուհի Թովմասյանը, այլև բազմաթիվ գործիչներ, անհատներ նման հուժկու հայտարարություններ են անում , առաջարկներ են անում, գործողություններ են պահանջում։ Ես իմ տեսակով հանդարտ մարդ եմ և կարծում եմ` մեր ֆրակցիայի բացարձակ մեծամասնությունն էլ այդպիսին է։ Մենք կողմնակից ենք խնդրի հետևողական լուծման, աշխատանքի, քայլ առ քայլ հզորացման։ Ես առաջարկել եմ դիմադրության շարժում, և երբ այդ շարժումը ծավալվի, հզորանա ու հասունանա այդ պահը, ո՛չ մանդատը, ո՛չ ԱԺ–ում լինելը, որևէ բան մեզ չի կաշկանդի»,– ասաց Վարդանյանը։
Ինչ վերաբերում է ընդդիմության վերջին գործողություններին ուղղված հանրային դժգոհություններին, Վարդանյանը չհերքեց` սխալներ լինում են։
«Մենք գործում ենք։ Այո՛, սխալներով, այո՛, թերություններով, այո՛, որոշակի անկազմակերպվածությամբ։ Բայց խնդիրը հստակ է, ուրիշ լուծում չկա, սրանք պիտի հեռանան, և պիտի գան բազմակողմ, կարող ուժեր, որպեսզի այս վիճակը գոնե քայլ առ քայլ հանգուցալուծվի»,– ասաց Վարդանյանը։
Հիշեցնենք` ԱԺ «Պատիվ ունեմ» խմբակցության պատգամավոր Թագուհի Թովմասյանը երեկ Facebook-ում գրառում էր արել` ընդդիմության առաջնորդներին առաջարկելով հնարավորինս շտապ քննարկել մանդատներից հրաժարվելու հարցը և մանդատ վերցնողներին հայրենիքի դավաճան հայտարարել։