ԵՐԵՎԱՆ, 17 նոյեմբերի – Sputnik. Ադրբեջանը, հաղորդակցության ուղիների բացում ասելով, նկատի ունի Գորիսի ու Կապանի հաղորդակցությունը` Ադրբեջանի տարածքով։ Այսօր ՀՀ ԱԺ–ում նման հայտարարություն արեց ՀՀ վարչապետ Նիկոլ Փաշինյանը` պատգամավորների հետ հարցուպատասխանի ժամանակ անդրադառնալով եռակողմ հայտարարության` տարածաշրջանային հաղորդակցությունների բացման մասին կետին։
«Մենք այդպիսի հաղորդակցություն ստանալու կարիք չունենք։ Դա մեզ համար ընդամենը տեխնիկական հարց է, և մենք հիմա նոր ճանապարհ ունենք` Երևան–Կապան, և որքան էլ դա հիմա կարճաժամկետ բարդություններ ստեղծի, առաջիկա ամիսների ընթացքում մենք կունենանք այլընտրանքային ճանապարհներ և՛ Ճակատենի համար, և՛ Որոտանի, և՛ Բարձրավանի, և՛ Շուռնուխի, և՛ Գորիս–Կապանի»,– ասաց Փաշինյանը։
Ինչ վերաբերում է Ադրբեջանի մեկնաբանությամբ ապաշրջափակման բանաձևին, Փաշինյանի բնորոշմամբ` այն ոչ մի կապ չունի նոյեմբերի 9-ի ու հունվարի 11-ի հայտարարությունների տեքստերի հետ։
Վարչապետը նաև մեկնաբանեց, թե ինչու է իր հրապարակային ելույթներում Գորիս–Կապան ավտոճանապարհի մի հատվածը կոչում Էյվազլի– Չայզանի հատված։ Փաշինյանը վստահեցրեց, որ այս ընթացքում ՀՀ կառավարությունը մանրամասն ուսումնասիրել է Սովետական Ադրբեջանի ու Սովետական Հայաստանի միջև սահմանազատմանը վերաբերող դե յուրե նշանակություն ունեցող բոլոր փաստաթղթերը։
«Որևէ այդպիսի փաստաթղթով խնդրո առարկա հատվածը ՀՀ տարածքում չի գտնվում։Եվ երբ որ մենք ասում ենք, որ երեկվա իրադարձությունների թատերաբեմը միանշանակ ՀՀ տարածք է, ու մեզ ասում են` որտեղից գիտեք, մենք ասում ենք` մենք դա գիտենք այնպես, ինչպես գիտենք, որ Էյվազլի– Չայզանի հատվածը ՀՀ տարածք չէ»,– հայտարարեց Փաշինյանը։
Այն, որ անկախություն հռչակած Ադրբեջանի Հանրապետությունն իրեն չի հռչակել Խորհրդային Ադրբեջանի իրավահաջորդ, ըստ Փաշինյանի` ոչ մի նշանակություն չունի, որովհետև ՀՀ–ն անկախությունը հռչակել է ՀԽՍՀ տարածքում և միջազգային հանրությունը ՀՀ–ն ճանաչել է որպես այդպիսին։