ԵՐԵՎԱՆ, 16 նոյեմբերի – Sputnik. Երևանի ընդհանուր իրավասության դատարանն այսօր նույնպես հետաձգեց ՀՀ երկրորդ նախագահ Ռոբերտ Քոչարյանի և նախկին փոխվարչապետ Արմեն Գևորգյանի գործով դատական նիստը։
Նշենք, որ նիստը նախագահում էր դատավոր Աննա Դանիբեկյանը, իսկ ՀՀ երկրորդ նախագահ Ռոբերտ Քոչարյանն ու գործով անցնող ՀՀ նախկին փոխվարչապետ Արմեն Գևորգյանը ներկա էին նիստին։
«Արմեն Գևորգյանի պաշտպան Ալեքսանդր Կոչուբաևը դիմում է ներկայացրել դատարանին և տեղեկացրել, որ մեկ այլ նիստի մասնակցելու պատճառով այսօր չի կարող ներկայանալ այս նիստին։ Գևորգյանի մյուս պաշտպան Լուսինե Սահակյանն էլ տեղեկացրել է, որ ինքնազգացողության վատթարացման պատճառով չի կարող ներկա գտնվել նիստին և կից ներկայացրել է նաև բժշկական տեղեկանքը։ Նիստն այս պայմաններում ենթակա է հետաձգման»,–ասաց Դանիբեկյանը։
Դատավորը հավելեց, որ ինքն էլ գտնվելու է ամենամյա արձակուրդում, ինչի պատճառով դատական նիստը հետաձգվեց մինչև դեկտեմբերի 14-ը։ Այսպիսով, հաջորդ դատական նիստը տեղի կունենա դեկտեմբերի 14-ին, ժամը 13-ին։
Նախորդ` նոյեմբերի 9-ի նիստը նույնպես հետաձգվել էր` Քոչարյանը ՀՀ երրորդ նախագահ Սերժ Սարգսյանի մայրիկի թաղմանը պետք է մասնակցեր և ներկա չէր նիստին։
Հիշեցնենք, որ ՀՀ երկրորդ նախագահ Ռոբերտ Քոչարյանին այս գործով առանձնապես խոշոր չափերի կաշառքի, իսկ նախկին փոխվարչապետ Արմեն Գևորգյանին՝ փողերի լվացման մեղադրանք է առաջադրվել: