ԵՐԵՎԱՆ, 15 նոյեմբերի – Sputnik. Ռուսաստանի Դաշնությունում ՀՀ քաղաքացիների մահից հետո նրանց անչափահաս երեխաները, ովքեր խնամակալության կարիք ունեին, ոստիկանության ծառայողների շնորհիվ տեղափոխվել են Հայաստան ու հանձնվել Սպիտակի քաղաքապետարանի Խնամակալության և հոգեբարձության մարմնի ներկայացուցիչներին։ Տեղեկությունը հայտնում են ՀՀ ոստիկանությունից։
«ՌԴ–ում ՀՀ դեսպանություն էր դիմել երեխաների հորաքույրը։ Նա շեշտել էր, որ երեխաների խնամակալությունը ստանձնելու համար անչափահասներին անհրաժեշտ է տեղափոխել Հայաստան։ Վերջիններս, սակայն չունեն համապատասխան փաստաթղթեր։ Տեղեկությունն անմիջապես հայտնել են ՀՀ ոստիկանությանը»,– նշում են ոստիկանությունից։
Ռուսաստանում ՀՀ դեսպանության ներկայացուցիչների հետ համատեղ միջոցառումներով ձեռք են բերվել անչափահասներին Հայաստան տեղափոխելու համար անհրաժեշտ փաստաթղթեր։
Նոյեմբերի 11-ին, ԱՊՀ անդամ-երկրների միջև անչափահասներին իրենց մշտական բնակության երկրներ վերադարձնելու համաձայնագրի պահանջների համաձայն` ոստիկանության անչափահասների հանցավորության և ընտանեկան բռնության կանխարգելման վարչության ծառայողներն անչափահասներին Ռուսաստանից տեղափոխել են Հայաստան և հանձնել Սպիտակի քաղաքապետարանի Խնամակալության և հոգաբարձության մարմնի ներկայացուցիչներին։