ԵՐԵՎԱՆ, 12 նոյեմբերի – Sputnik. Սյունիքի մարզի Գորիս խոշորացված համայնքի Բարձրավան բնակավայր տանող երկու այլընտրանքային ճանապարհ կա, երկուսն էլ այս պահին դժվարանցանելի են։ Sputnik Արմենիայի հետ զրույցում տեղեկությունը հայտնեց բնակավայրի վարչական ղեկավար Օնիկ Ավագյանը։
«Նոյեմբերի 10-ից Գորիս-Կապան ճանապարհին տեղակայված ադրբեջանական մաքսակետերի պատճառով շրջափակման մեջ է հայտնվել նաև Բարձրավանը։ Այլընտրանքային ճանապարհներն ահավոր վիճակում են։ Գորիսի փոխհամայնքապետ Կարեն Քոչարյանն այսօր մի կերպ է գյուղ հասել։ Երեկվանից մինչև այսօր մեր գյուղացիներից որևէ մեկը դուրսուներս չի արել»,- ասաց նա։
Իսկ Քոչարյանը գյուղ է հասել, որ հաց հասցնի բարձրավանցիներին։ Արդեն երկրորդ օրն է` Գորիսի համայնքապետարանի մեքենաներն են Բարձրավան հաց հասցնում։ Առայժմ միայն հացի մասին են մտածում, եթե այլընտրանքային ճանապարհները չբարեկարգվեն՝ բազմաթիվ այլ խնդիրները ի հայտ կգան, գյուղն էլ Գորիսից ամբողջովին կկտրվի։
Բարձրավանի ճանապարհը
© Sputnik / Aram Nersesyan
Շրջափակման հետևանքով երեկ բնակավայրում դասապրոցեսը լիարժեք չի կազմակերպվել։ Դպրոց են գնացել միայն այն ուսուցիչները, որոնք Բարձրավանում են բնակվում։ Այսօր արդեն մեծ դժվարությամբ Գորիսում բնակվող դպրոցի տնօրենն ու ուսուցիչներն էլ են բնակավայր հասել։
Ավագյանն ասում է՝ այս պահին երկու տեխնիկա է աշխատում Բարձրավանը Գորիսին կապող այլընտրանքային ճանապարհներից մեկը բարեկարգելու համար, բայց չդադարող տեղումները շատ են խանգարում առանց այն էլ դանդաղ ընթացող աշխատանքներին․ հողը քանդում են՝ ցեխ է դառնում։
Վարչական ղեկավարի կարծիքով՝ մինչև տարեվերջ չեն հասցնի գոնե հողահարթեցման աշխատանքներն ավարտել, որ մարդիկ կարողանան բնակավայրից դուրս գալ, առաջին անհրաժեշտության մթերք ու պարագաներ գնել։
«Ահավոր վիճակ է։ Երկու տեխնիկա է աշխատում, խոսքը մոտ 10 կմ ճանապարհի մասին է։ Ինչքան էլ ուզենան արագ բարեկարգել, եղանակային պայմանները թույլ չեն տա, որ մինչև տարեվերջ այդ ճանապարհը սարքեն, խճապատեն, նոր ասֆալտապատեն»,- նշեց նա։
Այսօր հացի, ուսուցիչների տեղափոխման, վաղը կարող է շտապօգնության կարիք լինել։ Ավագյանը բացառում է, որ եղած ճանապարհներով առաջին բուժօգնություն մատուցող ծառայությունը կարող է Գորիսից Բարձրավան հասնել։ Ստիպված են հույսը դնել Կապանից եկող շտապօգնության ծառայության վրա, իսկ թե երբ և ինչպես այն տեղ կհասնի՝ Աստծուն է հայտնի։
Բարձրավանի ճանապարհը
© Sputnik / Aram Nersesyan
Վարչական ղեկավարի խոսքով՝ Մ2 միջպետական ճանապարհին ադրբեջանական մաքսակետեր տեղադրելու հետևանքով հումանիտար խնդիրներից զատ կարող են նաև անվտանգային լրջագույն խնդիրներ առաջ գալ։ Ավագյանը չի կարողանում հաշտվել` ինչպես կարելի է թուրքի քթի տակ ապրել։
«Սրանք դեռ ծիծեռնակներն են։ Դեռ ավելի վատ բաների ենք սպասում։ Այդ ճանապարհով ոչ ոք չի երթևեկելու, ամբողջն անցնելու է Ադրբեջանի տրամադրության տակ։ Սկսվելու է մարդագողությունը, անասնագողությունը, մեքենագողությունը` եթե հանկարծ մեկը համարձակվի այդտեղով շարժվել։ Դա է լինելու։ Ի՞նչ խաղաղություն։ Ո՞նց կարելի է հավատալ նման բանի։ Թուրքի հետ խաղաղություն՝ անհնարին է։ Թուրքի հետ միայն ուժով պետք է խոսել, միայն ուժն է, որ թուրքին հետ է պահում»,- եզրափակեց Բարձրավանի վարչական ղեկավարը։
Բարձրավանի ճանապարհը
© Sputnik / Aram Nersesyan
Հիշեցնենք` նոյեմբերի 10–ին ՀՀ ԱԽՔ Արմեն Գրիգորյանը Հանրային հեռուստաընկերությանը տված հարցազրույցի ժամանակ հայտարարեց, որ Գորիս–Կապան ճանապարհին Ադրբեջանը գիշերը մաքսակետեր կտեղադրի։
Դրանից հետո կյանքն այդ տարածաշրջանում ավելի է բարդացել։