Գորիս–Կապան մայրուղում ադրբեջանական մաքսկետի դեմ բողոքի ակցիա իրականացնողները փորձեցին մոտենալ կառավարության շենքին։ Ոստիկանները հետ մղեցին ցուցարարներին՝ թույլ չտալով անմիջականորեն մոտենալ ՀՀ կառավարության շենքին։ Հրմշտոց սկսվեց, որը վերաճեց ծեծկռտուքի։ Մասնակիցները վանկարկում են «Նիկոլ, դավաճան»։
Ինչպես արդեն հայտնել էինք, այսօր կառավարության նիստի ընթացքում մի քանի ընդդիմադիր պատգամավորներ և Գորիս–Կապան մայրուղում ադրբեջանական մաքսկետի դեմ բողոքող մարդիկ հավաքվել են կառավարության շենքի մոտ։ Նրանք իշխանություններին մեղադրում են ազգային շահերին դավաճանելու համար: Ցույցին մասնակցում են «Հայաստան» դաշինքի պատգամավորներ Գեղամ Մանուկյանը, Աննա Գրիգորյանը և Թադևոս Ավետիսյանը:
Նախօրեին հանրային հեռուստատեսությանը տված հարցազրույցում Անվտանգության խորհրդի քարտուղար Արմեն Գրիգորյանը հայտնել էր, որ կեսգիշերին ադրբեջանական կողմը մաքսակետեր կտեղադրի Գորիս-Կապան ճանապարհահատվածում: Միաժամանակ նա նշել էր, որ հայկական կողմը «պատասխան քայլեր կձեռնարկի և նույնպես մաքսային կետեր կտեղակայի»:
Այնուհետև ցույցի մասնակիցները փորձեցին փակել երթևեկությունը Հանրապետության հրապարակում, սակայն ուժայինները բառացիորեն դուրս են հրեցին նրանց փողոցի երթևեկելի մասից։