ԵՐԵՎԱՆ, 8 նոյեմբերի – Sputnik. Լինչեպինգի համալսարանի (Շվեդիա) գիտնականները միկրոբիոմի համար համեմատաբար անվտանգ հակաբակտերիալ դեղամիջոց են գտել միզուղիների վարակների բուժման համար. Դա տեմոցիլինն է:
Որպես կանոն, միզուղիների ծանր վարակները բուժվում են ցեֆոտաքսիմի ներարկումով։ Սակայն ժամանակի ընթացքում շատ բակտերիաներ կորցրել են զգայունությունը դեղամիջոցի նկատմամբ, ինչն էլ ստիպել է մասնագետներին այլընտրանք փնտրել։
Շվեդ գիտնականների հետազոտությանը մասնակցել է պիելոնեֆրիտով (երիկամային լոխանոկների բորբոքում) 152 պացիենտ․ որոնք բաժանվել են երկու խմբի:
Առաջին խմբին յուրաքանչյուր ութ ժամը մեկ ներարկել են ցելոֆաքսիմ, իսկ երկրորդին՝ տեմոցիլին։ Բուժման ընթացքում մասնագետները հետևել են հիվանդների աղիքային միկրոֆլորայի վրա դեղերի ազդեցությունը։
Հետազոտության արդյունքում պարզվել է, որ տեմոցիլինը, ի տարբերություն ցեֆոտաքսիմի, պակաս ագրեսիվ է ազդում աղիքային ֆլորայի վրա, ինչը թույլ է տալիս արդյունավետ և արագ բուժել միզուղիների վարակով հիվանդին՝ առանց նրա աղիներում մեծ քանակությամբ օգտակար բակտերիաներ ոչնչացնելու:
Հակաբիոտիկների օգտագործումը կարող է առաջացնել դիսբակտերիոզ, այսինքն՝ աղիքային միկրոֆլորայի նորմալ կազմի ողջ գործառույթների խախտում: Լայն սպեկտրի հակաբիոտիկները, որոնք արդյունավետ են բազմաթիվ տարբեր բակտերիաների նկատմամբ, կարող են խոցել անհրաժեշտ բակտերիաների մինչև 30%-ը։