ԵՐԵՎԱՆ, 7 նոյեմբերի – Sputnik․ Վրաստանի երրորդ նախագահ Միխեիլ Սաակաշվիլին արձագանքել է համացանցում տարածված այն կադրերին, որոնցում երևում է, թե ինչպես է նա ուտում։
Facebook-ի իր էջում Սաակաշվիլին գրել է, որ ընդունել է ընդամենը հանքային և վիտամինային հավելումներ՝ կենսական ֆունկցիաների պահպանման համար։
Ավելի վաղ Վրաստանի արդարադատության նախարարության հատուկ քրեակատարողական ծառայությունը տեսանյութ և լուսանկար էր տարածել։ Դրանցում երևում է, թե ինչպես է բուժանձնակազմը նախկին նախագահին կերակրում սննդարար փոշենման խառնուրդներով և մանկական խյուսերով:
«Բուժկաբինետ ոչ ոք չի գնում սննդի հետևից։ Այստեղ տեղադրված տեսախցիկները ոչ թե նրա համար են, որ հետո ձայնագրությունը տեղադրվի համացանցում, այլ՝ անվտանգության նպատակով։ Բնականաբար, ես գիտեի, որ ամեն ինչ արձանագրվում է, ինչն էլ ավելի անհեթեթ է դարձնում տարածված տեսանյութը»,- գրել է Սաակաշվիլին։
Նա ընդգծել է, որ ուտել կարելի է միայն բանտախցում, իսկ բուժկետում ընդունում են միայն դեղամիջոցներ։ Ավելին, նախկին նախագահը կարծում է, որ կադրերն իր օգտին են։ Հիմա բոլորը համոզվել են, որ նա իրականում քաղցած է և, մեղմ ասած, լավ վիճակում չէ։
Ընդ որում Սահակաշվիլին ընդգծել է, որ այդ ամբողջ «արտահոսքը» հանգեցրել է նրան, որ ինքն արդեն հրաժարվել է նաև այդ հավելումներն ընդունելուց, ինչին տվել է իր գրավոր համաձայնությունը:
Ավելի վաղ հաղորդվել էր, որ երկարատև հացադուլի հետևանքով Սաակաշվիլիի մոտ հիշողության հետ կապված խնդիրներ են առաջացել: Նախկին նախագահի փաստաբանը հայտնել է, որ չի կարողանում հիշել մարդկանց անունները։ Քաղաքական գործիչը հացադուլ է հայտարարել ավելի քան 35 օր առաջ։ Միխեիլ Սաակաշվիլիին Վրաստանում ձերբակալել են հոկտեմբերի 1-ին այն բանից հետո, երբ նա ապօրինաբար ներթափանցել է երկրի տարածք։
Հիշեցնենք` Ուկրաինայի քաղաքացի Սաակաշվիլին Վրաստանում հեռակա կարգով դատապարտվել է բանկիր Սանդրո Գիրգվլիանիի սպանության և պատգամավոր Վալերի Գելաշվիլիին ծեծի ենթարկելու գործով: Առաջինով նա դատապարտվել է 3 տարվա, երկրորդով՝ 6 տարվա ազատազրկման։ Բացի այդ, Սաակաշվիլին ներգրավված է 2007թ․-ի նոյեմբերի 7-ին ընդդիմադիր հանրահավաքը ցրելու, «Իմեդի» հեռուստաալիքում իրականացված հարձակման և պետբյուջեի միջոցների մսխման գործերով։ Այդ գործերը դատարանները դեռ քննում են, դատավճիռներ առայժմ չեն կայացվել։