ԵՐԵՎԱՆ, 6 նոյեմբերի – Sputnik. ՀՀ ԶՈւ ԳՇ պետի նախկին տեղակալ, գեներալ-լեյտենանտ Տիրան Խաչատրյանը հրաժարվել է ՀՀ վարչապետ Նիկոլ Փաշինյանի և ՀՀ նախագահ Արմեն Սարգսյանի դեմ ներկայացրած հայցադիմումից։ Այս մասին տեղեկանում ենք «Դատալեքս» դատական-տեղեկատվական համակարգից։
Իր հայցադիմումով Խաչատրյանը պահանջում էր ճանաչել Արշակ Կարապետյանին իրավունքի ուժով ՀՀ ԶՈւ գլխավոր շտաբի պետի առաջին տեղակալի պաշտոնին նշանակելու իրավահարաբերության բացակայությունը։
Հոկտեմբերի 29-ին կայացած նախնական դատական նիստի ընթացքում Տիրան Խաչատրյանի ներկայացուցիչը դիմում է ներկայացրել, որով հայցվորը հրաժարվել էր հայցից՝ հաշվի առնելով այն հանգամանքը, որ ՀՀ նախագահի հրամանագրով Արշակ Կարապետյանն ազատվել է Հայաստանի Հանրապետության զինված ուժերի գլխավոր շտաբի պետի առաջին տեղակալի պաշտոնից։ Դատարանը որոշել է կարճել գործի վարույթը։
Հիշեցնենք, որ Նիկոլ Փաշինյանի որոշմամբ հուլիսի 20-ին Արտակ Կարապետյանը նշանակվեց պաշտպանության նախարարի առաջին տեղակալ, իսկ դրանից մի քանի ժամ առաջ նախագահի հրամանագրով հանվել էր ԳՇ պետի առաջին տեղակալի պաշտոնից։
Այս տարվա ապրիլին նա դարձավ ԳՇ պետի առաջին տեղակալ` այդ պաշտոնում փոխարինելով «Իսկանդերների» հետ կապված սկանդալի պատճառով պաշտոնից հեռացված Տիրան Խաչատրյանին։ Մինչ ԳՇ–ում աշխատելը Կարապետյանը ՀՀ վարչապետ Նիկոլ Փաշինյանի խորհրդականն էր։
Կարապետյանի «աստեղային ժամը» եկավ այն բանից հետո, երբ այս տարվա փետրվարին ԳՇ–ն պահանջեց Փաշինյանի հրաժարականը։ Վարչապետը ԳՇ պետ Օնիկ Գասպարյանին, իսկ դրանից առաջ էլ նրա տեղակալ Տիրան Խաչատրյանին ազատեց պաշտոնից։
Այժմ Արշակ Կարապետյանը ղեկավարում է պաշտպանության նախարարությունը։