ԵՐԵՎԱՆ, 5 նոյեմբերի - Sputnik. 2020 թվականի հոկտեմբերի 4-ին Շուշիի մշակույթի տան դահլիճում 27 ոստիկանների զոհվելու փաստի առթիվ հարուցվել է քրեական գործ։ Տեղեկությունը Sputnik Արմենիային հայտնեց ՀՀ քննչական կոմիտեի մամուլի քարտուղար Վարդան Թադևոսյանը։
Քրեական գործը հարուցվել է հոկտեմբերի 22–ին ՀՀ քրեական օրենսգրքի 367-րդ հոդվածի 3-րդ մասով (ծառայության նկատմամբ անփույթ վերաբերմունք, որը պատճառել է էական վնաս ու կատարվել է ռազմական դրության, պատերազմի ժամանակ կամ մարտի պարագաներում):
Կատարվում է նախաքննություն։ Այլ մանրամասներ հայտնի չեն։
Հիշեցնենք` 44-օրյա պատերազմի առաջին շաբաթվա ընթացքում՝ 2020 թվականի հոկտեմբերի 4-ին, Շուշիի մշակույթի կենտրոնում հրետակոծության զոհ էին դարձել ավելի քան 20 ոստիկաններ։
Sputnik Արմենիան անդրադարձել էր այդ դեպքին։ Հայտնի է, որ ոստիկանները հավաքված են եղել մշակույթի տանը, ու թշնամին ԱԹՍ–ով կամ հրթիռով հարվածել է շենքին (հակառակորդը մեծ թվով մարդկանց կուտակում է արձանագրել, ամենայն հավանականությամբ, չանջատված սմարթֆոնների պատճառով), պայթյունից տանիքի տակի շերտը պոկվել է ու ընկել դահլիճում հավաքվածների վրա։