ԵՐԵՎԱՆ, 5 նոյեմբերի – Sputnik. Սան Ֆրանցիսկոյի Կալիֆոռնիայի համալսարանի (UCSF) գիտնականների հետազոտությունը կապ է հայտնաբերել գազավորված քաղցր ըմպելիքների օգտագործման ու բջջային մակարդակում վաղաժամ ծերացման միջև: Տեղեկությունը հրապարակվել է ԱՄՆ-ի հանրային առողջապահության ասոցիացիայի հանդեսում:
Փորձագետները վերլուծել են 20-65 տարեկան 5309 մարդու ինքնազգացողության մասին տվյալները, որոնք 1999-2002 թվականներին ստացել են առողջության ու սննդի ազգային հետազոտության շրջանակում:
Պարզվել է, որ հաճախ գազավորված ըմպելիքներ օգտագործող մարդկանց մոտ տելոմերները (ԴՆԹ-ի հատվածներ են, որոնք կապված են խրոնիկական հիվանդությունների զարգացման ռիսկի բարձրացման ու կյանքի տևողության կրճատման հետ) ավելի կարճ են։ Միևնույն ժամանակ, նրանց մոտ, ովքեր պարբերաբար թարմ մրգերից քամված հյութերը են խմում, թելոմերներն ավելի երկար են։
Աշխատանքի հեղինակներից հոգեբուժության պրոֆեսոր Էլիսա Էպելն ասել է, որ գազավորված քաղցր ըմպելիքները ոչ միայն բարձրացնում են հիվանդությունների առաջացման ռիսկը, այլ նաև կրճատում են կյանքի տևողությունը։ Մասնագետն ընդգծել է, որ այդ կապն առաջին անգամ է հայտնաբերվել։
«Այս կանոնը պահպանվում է անկախ տարիքից, ռասայից, եկամտից ու կրթական մակարդակից։ Թելոմերի կրճատումը սկսվում է հիվանդության սկսվելուց շատ առաջ», - ավելացրել է նա։
Գիտնականը նշել է, որ թեև հետազոտությանը մասնակցել են միայն մեծահասակները, դրա արդյունքները կարելի է տարածել նաև երեխաների վրա: