ԵՐԵՎԱՆ, 3 նոյեմբերի – Sputnik. Բռնցքամարտի Հայաստանի ֆեդերացիան բողոքարկել է մրցավարների անարդար որոշումը կապված Եվրոպայի կրկնակի չեմպիոն Հովհաննես Բաչկովի երեկվա մարտից հետ. տեղեկությունը հայտնում է ԿԳՄՍ նախարարությունը։
Նշենք, որ Սերբիայում ընթացող Բռնցքամարտի աշխարհի առաջնությունում Հայաստանի ներկայացուցիչ, Եվրոպայի կրկնակի չեմպիոն Հովհաննես Բաչկովը կիսաեզրափակիչ պայքարում երեկ, մրցավարների որոշմամբ, պարտվել էր Թաիլանդի ներկայացուցիչ Սոմչայ Վոնգսուվանին։
Եվ դա այն դեպքում, երբ Բաչկովը նկատելի առավելություն ուներ մրցակցի նկատմամբ։ Առաջին ռաունդում 5 մրցավարներից 4-ը հաղթանակը տվեցին Բաչկովին, սակայն երկրորդում առավելություն տվեցին թաիլանդցի բռնցքամարտիկին։
Իսկ ահա 3-րդ ռաունդում եզրային մրցավարներից մեկի որոշումը վճռորոշ եղավ և 3:2 հաշվով հաղթանակը շնորհվեց Թաիլանդի ներկայացուցչին:
«Հայաստանի բռնցքամարտի ֆեդերացիայի բողոքարկումից հետո հաղթանակը շնորհվել է հայ բռնցքամարտիկին»,–նշված է հաղորդագրության մեջ։
Հիշեցնենք, որ երեկ գերծանր քաշային Դավիթ Չալոյանը քառորդ եզրափակիչում կամային հաղթանակ տարավ Ուզբեկստանի ներկայացուցիչ Լալիզբեկ Մոլուջանովի նկատմամբ և դուրս եկավ կիսաեզրափակիչ՝ ապահովելով առնվազն բրոնզե մեդալ։
Այսպիսով, աշխարհի առաջնության կիսաեզրափակիչում Հայաստանը կունենա երկու ներկայացուցիչ:
Հիշեցնենք՝ բռնցքամարտի աշխարհի առաջնությանը Հայաստանը ներկայացված էր 11 մարզիկով։
ԱԻԲԱ-ի 75-ամյա պատմության մեջ առաջին անգամ բռնցքամարտի աշխարհի առաջնության մրցանակակիրները կպարգևատրվեն. ընդհանուր առմամբ սահմանվել է 2,6 միլիոն դոլար մրցանակային ֆոնդ։ ԱԱ-ի ոսկե մեդալակիրները կստանան 100, արծաթե մեդալակիրները` 50, իսկ բրոնզե մեդալակիրները` 25 հազարական ԱՄՆ դոլար: