ԵՐԵՎԱՆ, 2 նոյեմբերի – Sputnik. Օպերային երգչուհի Սվետլանա Կասյանի առաջին սոլո ալբոմը՝ «Fratelli Tutti»-ն, լույս կտեսնի դեկտեմբերի 17-ին՝ Հռոմի սրբազան քահանայապետ Ֆրանցիսկոս պապի 85-ամյակի օրը, և նվիրված կլինի կաթոլիկ աշխարհի հայրապետին։ Կասյանն այդ մասին պատմել է ՌԻԱ Նովոստիին։
«Առաջին սոլո ալբոմս ձայնագրվել է հունիսին Լոս Անջելեսի ստուդիայում։ «Fratelli Tutti» իտալերենից թարգմանաբար նշանակում է «Բոլորը եղբայրներ են», այդպես էր կոչվում նաև հայրապետի վերջին էնցիկլիկան (Հռոմի պապի կոչը եպիսկոպոսներին և հավատացյալներին՝ խմբ․) 2020 թվականին։ Այն դիմում է ոչ միայն կաթոլիկներին, այլև ամբողջ աշխարհի հավատացյալներին` հիշեցնելով, որ տարբեր կրոնների և ազգությունների մարդիկ պետք է խաղաղ ապրեն։
Ալբոմը հենց այդ հայեցակարգով է ստեղծվել, ներառված են տարբեր լեզուներով ստեղծագործություններ՝ իտալերեն, վրացերեն, հայերեն, եբրայերեն, լատիներեն։
Երգչուհու պրոդյուսերն ու ամուսինը՝ Հնահավատների (Староверы) համաշխարհային միության նախագահ Լեոնիդ Սևաստյանովն ասել է, որ երգչուհին ու քահանայապետը բարեկամական հարաբերություններ ունեն, իսկ Ֆրանցիսկոսը երգչուհու տաղանդի երկրպագուն է։ 2019թ․-ին Ֆրանցիսկոս պապը մշակույթի բնագավառում ունեցած վաստակի համար Կասյանին պարգևատրել է Սուրբ Սիլվեստրի ասպետական շքանշանով:
Սուրբ Սիլվեստրի շքանշանը Վատիկանի պետական պարգևն է, շնորհվում է աշխարհիկ մարդկանց կաթոլիկ եկեղեցուն մատուցած ծառայությունների համար։ Սովորաբար շքանշանի ասպետ (կավալեր) են դառնում գիտության, արվեստի և գրականության ոլորտում աչքի ընկած մարդիկ։ Կարող են պարգևատրվել ինչպես կաթոլիկները, այնպես էլ այլ դավանանքների ներկայացուցիչները։ Կասյանը Վատիկանի ամբողջ պատմության ընթացքում առաջին օպերային երգչուհի-կավալերն է («դաման»՝ շքանշանի կին ասպետները)։