ԵՐԵՎԱՆ, 2 նոյեմբերի – Sputnik. ՀՀ ԿԲ խորհուրդն այսօրվա նիստում որոշում է ընդունել վերաֆինանսավորման տոկոսադրույքը անփոփոխ՝ 7.25% թողնելու մասին: Այս մասին այսօր հրավիրված ասուլիսում հայտարարեց ՀՀ ԿԲ նախագահ Մարտին Գալստյանը։
«2021թ–ի սեպտեմբերին գրանցվել է 0.1 տոկոս գնանկում` նախորդ տարվա նույն ամսվա 0.2 տոկոս գնանկման դիմաց, որի պարագայում 12-ամսյա գնաճը մնացել է անփոփոխ` ամսվա վերջին կազմել է 8.9 տոկոս։ Իսկ 12-ամսյա բնականոն գնաճը սեպտեմբերին պահպանվել է 8 տոկոս մակարդակի վրա»,– ասաց Գալստյանը։
ԿԲ նախագահն արձանագրեց, որ կորոնավիրուսի դեմ պատվաստումների ակտիվ գործընթացի ֆոնին ՀՀ գործընկեր երկրներում նկատվում է տնտեսական ակտիվության ու համախառն պահանջարկի վերականգնում։ Հայաստանի տնտեսության վրա նկատվում է արտաքին գործոններով պայմանավորված գնաճային ազդեցություն։
ՀՀ տնտեսական զարգացումները կանխատեսում են ակտիվության անկում, ինչը ԿԲ նախագահը պայմանավորեց գյուղատնտեսության ոլորտում առկա անկմամբ ու համավարակի հերթական ալիքի տարածման հետևանքով ծառայությունների ճյուղերում ակնկալվող դանդաղեցմամբ։
ՀՀ տնտեսության զարգացմանը հիմնականում նպաստում են մասնավոր սպառումը, արտերկրից ստացվող տրանսֆերտները և մասնավոր խնայողությունների նվազումը։
«Այս պայմաններում ՀՀ ԿԲ խորհուրդը գնահատում է, որ արտադրական կարողությունների ընդլայնման նկատմամբ մասնավոր սպառման դեռևս պահպանվող առաջանցիկ աճը շարունակում է նպաստել ներքին գնաճային միջավայրի պահպանմանը»,– ասաց Գալստյանը։
Այսպիսով, ԿԲ կանխատեսումների համաձայն, այս տարի գնաճի բարձր մակարդակը կպահպանվի մինչև տարեվերջ, իսկ 2022թ–ին կմոտենա նպատակային 4 տոկոս ցուցանիշին։ Առկա գնաճային ռիսկերը, ԿԲ գնահատմամբ, հավասարակշռված են, իսկ անհրաժեշտության դեպքում ԿԲ–ն ի զորու է զսպելու դրանք։
Հիշեցնենք` սեպտեմբերի 14-ի նիստում ՀՀ ԿԲ խորհուրդը որոշում էր կայացրել բարձրացնել վերաֆինանսավորման տոկոսադրույքը 0.25 տոկոսով՝ այն 7 տոկոսից դարձնելով 7.25%: