Երևանի քաղաքապետարանը մայրաքաղաքում դիտահորերի վերատեղադրման, փոխարինման և ճանապարհներին հավասարեցման աշխատանքներ է սկսել։
«Վարորդների համար գլխացավանք դարձած, մաշված ու ասֆալտի նստվածքը խաթարող դիտահորերի կափարիչները փոփոխվում են։ Երևանում ընդհանուր առմամբ կա 16 հազար դիտահոր։ 2021 թվականին աշխատանքներ կտարվեն շուրջ 1800-ի ուղղությամբ»,– տեղեկացնում են Երևանի քաղաքապետարանից։
Նշվում է, որ խնդրի ուղղակի պատասխանատուն կապի, կոյուղու կամ այլ ծառայություններ մատուցող կազմակերպություններն են, որոնք տնօրինում ու օգտագործում են դիտահորերը, բայց համայնքը, կարևորելով քաղաքի բնակիչների անվտանգությունը, ինքն է ստանձնել խնդրի լուծումը։
«Նկատվել է, որ դիտահորերը նիշից ցածր են ու քայքայված վիճակում։ Կատարվել է 900 հատ թուջե կափարիչի վերաձուլում, 300 դիտահոր մաքրում, 50 անձրևորսիչի, 250 հատ էլ հին դիտահորի վերատեղադրում, ինչպես նաև 60 հատ նոր պանելի տեղադրում»,– ասում է Երևանի քաղաքապետարանի շինարարության և բարեկարգման վարչության պետ Գրիգոր Հարությունյանը։
Աշխատանքների ղեկավար Դավիթ Սահակյանն էլ նշում է, որ կատարվում են դիտահորերի պատերի ամրացման և երկաթբետոնե ծածկի փոխարինման աշխատանքներ։ Փորձնական ծրագրի մեծ մասը բաժին է ընկնում Կենտրոն վարչական շրջանին, աշխատանքներ են տարվում նաև մյուս շրջաններում։
Նրա խոսքով` ասֆալտապատման ծրագրերի շրջանակում նույնպես իրականացվում են դիտահորերի ուղղման ծրագրեր, յուրաքանչյուր վարչական շրջանում` շուրջ 15-16 հատ։
Ծրագրի իրականացման համար համայնքի բյուջեից ավելի քան 68 մլն դրամ է ծախսվելու։