Յուղ, որն օգնում է պայքարել թրոմբի և քաղցկեղի դեմ

ԵՐԵՎԱՆ, 31 հոկտեմբերի – Sputnik. Դդմի կորիզի յուղը հաճախ է օգտագործվում զանազան խոհարարական և բժշկական նպատակների համար, այն ստանում են դդմի չմաքրած կորիզներից։ Այս յուղի օգտակարության մասին գրում է «МК»-ն՝ հղում անելով ScienceDirekt, ACS գիտական ինտերնետ-պարբերականներին։

Դդմի կորիզը պոլիհագեցած յուղերի ավելի մեծ խտություն ունի, քան սննդային աղբյուրների մեծամասնությունը։ Դդմի կորզիների մեջ առկա օլեինաթթուն և լինոլաթթուն օգնում են նվազեցնել արյան ճնշումը և կարգավորել «վատ խոլեստերինի» (ցածր խտության լիպոպրոտեինների) մակարդակը, պաշտպանում են աթերոսկլերոզից, սրտի ցավերից, կաթվածներից և սրտի այլ խնդիրներից:

Դդումի սերմերի էքստրակտը կարող է օգտակար լինել հաստաղիքի քաղցկեղի վտանգի նվազեցման հարցում։ Կորիզներում առկա լիգնաններն ու ֆլավոնները կարող են ազդեցություն ունենալ հորմոնային կախում ունեցող նորագոյացությունների վրա։ Ուստի, հետազոտողների կարծիքով, դդմի կորիզներն ու դրանց էքստրակտները, որոնց թվին է պատկանում յուղը, կարող են առանցքային դեր խաղալ կրծքագեղձի քաղցկեղի կանխարգելման և բուժման ժամանակ։

Բացի այդ, հայտնաբերվել է, որ դդումի յուղը խթանում է արյան շրջանառությունը։ Դա օգնում է պաշտպանվել թրոմբների գոյացումից։