Այս դեպքը մեկն է տրիլիոնից. Ալեք Բոլդուինն առաջին անգամ խոսել է ողբերգության մասին

ԵՐԵՎԱՆ, 31 հոկտեմբերի – Sputnik. «Ժանգ» ֆիլմի նկարահանման հրապարակում տեղի ունեցած ողբերգությունից հետո, որտեղ Բոլդուինի արձակած կրակոցից զոհվել էր կինոօպերատոր Հալինա Հաթչինսիը, հոլիվուդյան դերասանն առաջին անգամ շփվել է լրատվամիջոցների ներկայացուցիչների հետ, հայտնում է CNN-ը։

Բոլդուինը պատասխանել է նրանց հարցերին, երբ լրատվամիջոցների ներկայացուցիչները հետապնդել են նրան ու հարցեր ուղղել։

«Նկարահանման հրապարակներում լինում են միջադեպեր, բայց ոչ այդպիսին։ Այս դեպքը մեկն է տրիլիոնից», — ասել է Բոլդուինը։

Դերասանը նշել է, որ իրեն արգելված է որևէ մեկնաբանություն տալ, քանի որ գործը հետաքննման փուլում է, և իրեն դեռ մեղադրանք չի առաջադրվել։

Բոլդուինը չի կարծում, որ ֆիլմի նկարահանումները կվերսկսվեն։

Հիշեցնենք՝ հոկտեմբերի 22-ին, Նյու Մեքսիկոյում «Ժանգը» մարտաֆիլմի նկարահանման ժամանակ Բոլդուինը պատահաբար սպանել էր ֆիլմի օպերատորին:

Ըստ սցենարի` Բոլդուինը պետք է կրակեր չլիցքավորված ատրճանակից ու ոչ մարտական փամփուշտներով: Բայց կրակոցի պահին փամփուշտը դուրս էր թռել ատրճանակից, բեկորները ցրվել էին ու վիրավորել նկարահանման հրապարակում գտնվող երկու անձի` ռեժիսոր Ջոել Սոուզին ու օպերատոր Հալինա Հաթչինսին։ Նրանք ուղղաթիռով հոսպիտալացվել էին, բայց 42-ամյա կին օպերատորի կյանքը փրկել չէր հաջողվել:

Միջադեպից հետո 63-ամյա դերասանը դադարեցրել է իր բոլոր նախագծերը, իսկ կատարվածից հետո առաջին ժամերին, ականատեսների խոսքով, դերասանը եղել է անմխիթար վիճակում և հիստերիայի մեջ։

Հայտնի է, որ ֆիլմի նկարահանող խմբի 6 անդամները բոյկոտել են ֆիլմի վրա աշխատանքը մահացու միջադեպից մի քանի ժամ առաջ: Կինեմատոգրաֆիստները լքել են նկարահանման հրապարակը՝ ի նշան երկարացված աշխատանքային օրվա, աշխատավարձի վճարման ձգձգումների դեմ բողոքի: Միջադեպից մեկ շաբաթ առաջ օպերատորներից մեկը բողոքել էր անվտանգության հետ կապված խնդիրներից, մասնավորապես դրանք կապված էին եղել նկարահանումների ժամանակ զենքի օգտագործման հետ։