ԵՐԵՎԱՆ, 30 հոկտեմբերի – Sputnik. Գեղարքունիքի մարզում ողբերգական ավտովթար է տեղի ունեցել, որի հետևանքով 1 մարդ մահացել է, 5-ը` հոսպիտալացվել։ Տեղեկությունը հայտնում է shamshyan.com-ը։
Դեպքը տեղի է ունեցել այսօր` ժամը 17:20-ի սահմաններում, Սևան-Մարտունի-Գետափ ավտոճանապարհի՝ Լիճք գյուղի վարչական տարածքում գտնվող «BBG» նախկին բժշկական կենտրոնի մոտ։
Իրար են բախվել Mitsubishi Pajero Io և Opel Astra մակնիշի ավտոմեքենաները։
Վթարի հետևանքով 6 հոգի տարբեր աստիճանի մարմնական վնասվածքներով տեղափոխվել են Մարտունու բժշկական կենտրոն:
Վիրավորներին առաջինը օգնության են հասել քաղաքացիներն ու փրկարարները: Փրկարարները նրանցից մի քանիսին ավտոմեքենայից դուրս են բերել՝ օգտագործելով հատուկ տեխնիկա:
Մինչ դեպքի վայրում աշխատում էին ոստիկանները, հիվանդանոցից ահազանգ է ստացվել, որ վիրավորներից մեկը, գիտակցության չգալով, մահացել է:
Փաստի առթիվ հարուցվել է քրեական գործ՝ քրեական օրենսգրքի 242 հոդվածի 2-րդ մասի հատկանիշներով (ճանապարհային երթևեկության և տրանսպորտային միջոցների շահագործման կանոնները խախտելը):
Ոստիկանները պարզում են վարորդների, մահացածի և վիրավորների ինքնությունը:
Վիրավորներից 3-ին տեղափոխում են Երևան: