ԵՐԵՎԱՆ, 30 հոկտեմբերի – Sputnik. Հոկտեմբերի 19-ին կառավարությունում վարչապետ Նիկոլ Փաշինյանի և արտախորհրդարանական ուժերի հետ հանդիպման ժամանակ ՀՅԴ–ական, «Հայաստան» խմբակցության պատգամավոր Իշխան Սաղաթելյանն ասել է, որ կապիտուլյացիան մեր պետության կործանումն է։ Սաղաթելյանն այդ մասին հայտարարեց Facebook–ի իր էջում հրապարակված տեսանյութում։
Հոկտեմբերի 27-ին ԱԺ-ում կառավարության հետ հարցուպատասխանի ընթացքում Փաշինյանը, ընդդիմադիրներին դիմելով, ասել էր, թե 2020-ի պատերազմի օրերին` հոկտեմբերի 19-ին, երբ փակ հանդիպման ժամանակ ասել է, որ «գնում եմ այս գնով պատերազմը դադարեցնելուն, ձեր ներկայացուցիչն ինչո՞ւ էր ասում, թե այդպես ոնց կլինի»...
Սաղաթելյանը 24 ժամ էր տվել իշխանությանը` պահանջելով հրապարակել այդ հանդիպման տեսագրությունը` հակառակ դեպքում խոստանալով հանդիպման մանրամասներն անձամբ ներկայացնել։
«Հոկտեմբերի 19-ին հանդիպումը սկսեց` ասելով, որ իրավիճակը ծանր է, ունենք բազմաթիվ կորուստներ։ Փաշինյանի խոսքով` իրեն է զանգել Արցախի նախագահ Արայիկ Հարությունյանը և ասել, որ նրան են դիմել Արցախի բոլոր նախկին նախագահները, ինչպես նաև Սերժ Սարգսյանը, Արցախի բոլոր քաղաքական ուժերը` առաջարկելով բանակցություններ սկսել նախկինում քննարկված տարբերակների շուրջ և զինադադարի գնալ։ Սա ակնհայտ սուտ է»,–ասաց Սաղաթելյանը` հավելելով, որ ՀՅԴ Արցախի խորհրդարանական ֆրակցիան որևէ փաստաթղթի տակ չի ստորագրել և նման առաջարկությամբ հանդես չի եկել։
Դրանից հետո, ըստ Սաղաթելյանի, Փաշինյանն ինչ–որ փաստաթուղթ է ցույց տվել, որն իբրև թե վկայում էր այն մասին, որ Արայիկ Հարությունյանը դիմել էր իրեն։
Պատգամավորի խոսքով` վարչապետն ասել է նաև, որ պատերազմը կանգնեցնելու գինը հետևյալն է` 5+2 շրջան հանձնել։
«Ես հետաքրքրվեցի, թե գոնե կարգավիճակի հարց կա՞, ինքն էլ պատասխանեց, որ չկա` հավելելով, թե «Լավրովյան պլանն» է` պլյուս-մինուս ինչ–որ բաներ։ Դիմելով նրան` ասացի` դու, փաստորեն, 23-24 օր հաղթելու ենք ասելուց հետո հիմա ասում ես, որ գնում ես կապիտուլյացիայի փաստաթուղթ ստորագրելու։ Ինքն էլ պատասխանեց, որ իրավիճակն այս է, նախկիններն էլ լավ ժառանգություն չեն թողել»,–ասաց Սաղաթելյանը։
Նա հավելեց, որ Փաշինյանին այդ օրն ասել է` նման խեղճացած հոգեվիճակով նա ի վիճակի չէ բանակցություն վարել և պետք է որևէ լուծում գտնի, ինչպես նաև հանրությանը հայտնի իրավիճակի մասին։ Փաշինյանն էլ խոստացել է ուղերձով հանդես գալ։
Սա էլ, ըստ Սաղաթելյանի, ամբողջ պատմությունն է այդ օրվա։