ԵՐԵՎԱՆ, 29 հոկտեմբերի – Sputnik. Բռնցքամարտիկ Կարեն Տոնականյանը հաղթանակ է տարել Սերբիայի մայրաքաղաք Բելգրադում անցկացվող բռնցքամարտի աշխարհի առաջնության հերթական փուլում։
Հայ բռնցքամարտիկը վաղաժամ հաղթանակ տարավ Մալիի ներկայացուցիչ Կարիմ-Աբդուլ Բաթիմի նկատմամբ։ Երրորդ ռաունդում Տոնականյանի մրցակից մալիացի բռնցքամարտիկի բժիշկների թիմը խնդրեց դադարեցնել մենամարտը։
Նշենք, որ առաջնության նախորդ փուլն էլ Տոնականյանը շրջանցել էր առանց պայքարի, քանի որ նրա մրցակիցը վարակվել էր կորոնավիրուսով և չէր ներկայացել մենամարտին։
Ավելի վաղ այսօր նույն առաջնությանը հաղթանակ էր տարել ևս մեկ հայ բռնցքամարտիկ՝ Վահե Բադալյանը։ 54 կգ քաշային Վահե Բադալյանը մրցել էր Թայվանի ներկայացուցիչ Յու-Հանգ Լինի հետ ու հաղթանակ տարել 5։0 հաշվով։
Այսօր երեկոյան ռինգ դուրս կգա Հայաստանի երրորդ և վերջին ներկայացուցիչը։ 71 կգ քաշային Արման Դարչինյանը կհանդիպի ղըրղզ Նուրդարին Ռուստամբեկի հետ։