ԵՐԵՎԱՆ, 28 հոկտեմբերի – Sputnik. Հայաստանի և Ռուսաստանի հարաբերություններն աքսիոմա են, եթե խոսենք մաթեմատիկական հասկացություններով։ Բայց այլ երկրների հետ հարաբերությունները թեորեմներ են, որոնք պետք է դեռ ապացուցել, որոնք մեկ առաջընթաց են ապրում, մեկ` հետընթաց: Այս մասին ՀՀ նախագահ Արմեն Սարգսյանը հայտարարել է ՌԲԿ-ին տված հարցազրույցում։
Նախագահը հիշեցրել է, որ բազմաթիվ հայեր ապրել են ինչպես Ռուսական կայսրությունում, այնպես էլ Օսմանյան կայսրությունում։ Այն, ինչ մնացել է ռուսական կայսրության հայերից, անկախ Հայաստանի Հանրապետությունն է և նույնքան հայեր, որոնք շարունակել են ապրել Ռուսաստանում:
«Հայերը բարեկեցիկ կյանքով են ապրում Ռուսաստանի Դաշնության ողջ տարածքում` Կալինինգրադից մինչև Վլադիվոստոկ», - կարծում է Արմեն Սարգսյանը:
Նախագահը կարծում է, որ երկկողմ հարաբերությունների զարգացման համար շատ մեծ ներուժ կա, չնայած Ռուսաստանը հսկայական երկիր է, իսկ Հայաստանը՝ փոքր: