ԵՐԵՎԱՆ, 27 հոկտեմբերի -Sputnik. Մուրմանսկի միգրացիոն ծառայության աշխատակիցներին հաջողվել կանխել հարսանիքի չեղարկումը։ Բանն այն է, որ նորապսակները հենց իրենց հարսանիքի օրը հայտնաբերել են, որ հարսնացուի անձնագրի մի քանի էջը շունը կրծոտել է։
Միգրացիոն ծառայության աշխատակիցները փաստաթուղթը վերականգնել են 40 րոպեում և արագ տարել արարողության վայր։ Այս մասին հայտնում է ՌԻԱ Նովոստին՝ վկայակոչելով տարածաշրջանային ՆԳՆ մամուլի ծառայությանը:
Մուրմանսկցի նորապսակներ Վասիլի և Անաստասիա Բալուևներն իրենց պսակադրության օրը, որը նշանակված էր ժամը 14-ին, խանութ գնալուց առաջ իրենց անձնագրերը դրել են միջանցքի սեղանին, որպեսզի հանկարծ չմոռանան: Այդ ընթացքում խուլիգան-շնիկը փորձել է «համտեսել» հարսնացուի անձնագիրը։ Էջերի մի մասն էլ նա պատռել է, ըստ երևույթին, անձնագրի թղթերն այնքան էլ համեղ չեն եղել, ինչպես սպասվում էր։
Ապագա ամուսինները տխրել են, բարկացել, արդեն մտածում էին` պսակադրությունը դժվար էլ կայանա, բայց, ամեն դեպքում, ՔԿԱԳ են գնացել։ Այնտեղ նրանց խորհուրդ են տվել դիմել ոստիկանություն։ Ռուսաստանի ՆԳՆ միգրացիայի վարչության Մուրմանսկի մարզի աշխատակիցը լսել է նրանց, զննել կիսապատռված անձնագիրը և անմիջապես խոստացել օգնել:
Ընդամենը 40 րոպե անց հարսնացուի նոր անձնագիրը պատրաստ էր։ Միգրացիայի հարցերով ստորաբաժանման տեսուչները համադրել են բոլոր տվյալները բազայի հետ, պատրաստել և տրամադրել են անձը հաստատող նոր փաստաթուղթ: Ճիշտ ժամը 14-ին Բալուևները գրանցել են իրենց ամուսնությունը։