ԵՐԵՎԱՆ, 23 հոկտեմբերի – Sputnik. Միացյալ նահանգներից F-16 կործանիչների գնման պատվերի ձևակերպման գործընթացը սկսվել է, Անկարան ուշադիր հետևում է ընթացքին։ Ըստ Anadolu գործակալության` այդ մասին հայտարարել է Թուրքիայի պաշտպանության նախարար Հուլուսի Աքարը։
«F-16 կործանիչների պարկն արդիականացման կարիք ունի։ Մենք ակնկալում ենք, որ ԱՄՆ–ն` որպես ռազմավարական գործընկեր և բարեկամ երկիր, ոչ միայն F-16–ներ կմատակարարի, այլև ներդրում կունենա Թուրքիայում առկա ռազմական ինքնաթիռների արդիականացման հարցում։ Պետք չէ մոռանալ, որ Թուրքիայի ուժեղացումը ՆԱՏՕ–ի պաշտպանական հզորության աճ է նշանակում։ Թուրքիայի սահմանները նաև դաշինքի սահմաններն են», – ասել է Աքարը։
Ավելի վաղ Թուրքիայի նախագահ Ռեջեթ Թայիփ Էրդողանը հայտարարել էր, որ ԱՄՆ–ն F-35 կործանիչների արտադրության ծրագրից Թուրքիային հեռացնելուց հետո Անկարային առաջարկել է F-16 կործանիչներ ձեռք բերել։