Խոշոր հարկատուները չեն փոխվում. ՊՆ–ն ու ԱԱԾ–ն առաջատարների շարքում են

ԵՐԵՎԱՆ, 20 հոկտեմբերի - Sputnik. Հայաստանյան խոշոր հարկատուների ցանկը 2021թ–ի երրորդ եռամսյակի տվյալներով գրեթե չի փոխվել։ Դրանում դարձյալ առաջին տեղերում հանքարդյունաբերողներն են, պետական խոշոր կառույցները, ծխախոտի բիզնեսի ներկայացուցիչներն ու վառելիքի շուկայում գերիշխողները։

Այսպես. ինչպես և 2021-ի նախորդ երկու եռամսյակներում, խոշոր հարկատուների ցուցակի առաջատարը «Գազպրոմ Արմենիան» է, որը 9 ամսում պետական բյուջե 38 266 412 000 դրամ է մուտք արել, երկրորդը` Զանգեզուրի պղնձամոլիբդենային կոմբինատն է` 38 249 247 000 դրամ մուտքերով, երրորդը` ՀՀ պաշտպանության նախարարությունն է` 34 194 185 000 դրամով։

Երկրորդ եռյակում Սոթքի հանքավայրը շահագործող «Գեոպրոմայնինգ Գոլդ» ընկերությունը, «Մասիս Տոբակն» ու «ՄՏՍ Հայաստանն» են։ Երրորդ եռյակը բաղկացած է «Թեղուտ», «ՍիՓիԷս օիլ» և «ֆլեշ» ընկերություններից։

Խոշորներ հարկատուների տասնյակը եզրափակում է «Ֆիլիպ Մորրիս Արմենիա» ընկերությունը։

Նշենք, որ նախարարություններից խոշոր հարկատուների ցանկում են նաև ԱԳՆ–ն` 701 մլն մուտքերով, Ֆինանսների նախարարությունը (624.7), Էկոնոմիկայի նախարարությունը (509.4 մլն), Առողջապահության նախարարությունը (501,4 մլն), ԿԳՄՍՆ–ը (373,2 մլն), Արդարադատության նախարարությունը (370,9): Իսկ, օրինակ ՊԵԿ–ը 9 ամսում 3 383 134 000 դրամի հարկային մուտքեր է վճարել, ԱԱԾ–ն` 3 294 788 000 դրամ։

Խոշոր հարկատուներ են նաև բանկերն ու ֆինանսական այլ կազմակերպությունները, բժշկական կենտրոնները։

Հիշեցնենք` ՊԵԿ-ը վերջերս հանդես էր եկել առաջարկությամբ` ՀՀ 1000 խոշոր հարկատուների ցանկից պետական և համայնքային կառավարչական հիմնարկները հանելու վերաբերյալ։ Բանն այն է, որ, ըստ ՊԵԿ հիմնավորման, այս կառույցներն իրականում ոչ թե բյուջետային մուտքեր են ապահովում, այլ բյուջեից ստացած ֆինանսավորման մի մասը` հարկերի տեսքով, դարձյալ վերադարձնում են բյուջե։

Եթե կառավարությունն ընդունի ՊԵԿ–ի առաջարկը խոշոր հարկատուների ցանկում առաջիկայում կտեղադրվեն միայն ռեալ տնտեսվարողներն ու հարկ վճարողները։