Արշակ Կարապետյանն ընդունել է պատերազմում զոհված ու անհետ կորած զինծառայողների հարազատներին

ԵՐԵՎԱՆ, 18 հոկտեմբերի – Sputnik. ՀՀ պաշտպանության նախարար Արշակ Կարապետյանն այսօր հանդիպել է 44-օրյա պատերազմում զոհված, անհետ կորած կամ գերության մեջ հայտնված զինծառայողների և կամավորականների հարազատների հետ։

Ինչպես հայտնում են ՊՆ–ից, հանդիպման ընթացքում քննարկվել են անհետ կորած զինծառայողների որոնողական աշխատանքներին, ինչպես նաև զոհվածերի շիրիմների բարեկարգմանը վերաբերող մի շարք հարցեր։

Արշակ Կարապետյանը լսել է հանդիպման մասնակիցների բարձրացրած խնդիրներն ու մտահոգությունները, պատասխանել նրանց հարցերին: Նախարարը վստահեցրել է, որ նշված խնդիրները գտնվում են ինչպես իր, այնպես էլ երկրի վարչապետի և ամբողջ կառավարության անմիջական ուշադրության կենտրոնում, և դրանց լուծման վերաբերյալ պատասխանատու ստորաբաժանումների ղեկավարներին տրված են հստակ հանձնարարականներ։

Հիշեցնենք` ՀՀ ՔԿ պաշտոնական տվյալներով, 44–օրյա պատերազմի հետևանքով Արցախում և ՀՀ-ում զոհված զինծառայողների և քաղաքացիական անձանց ընդհանուր թիվը 3788 է։ Հոկտեմբերի 4-ի դրությամբ անհայտ է 224 զինծառայողի և 22 քաղաքացիական անձի գտնվելու վայրը։ Մինչ օրս Ադրբեջանը ՀՀ–ին է հանձնել գերեվարված 108 զինծառայողների և քաղաքացիական անձանց։