ԵՐԵՎԱՆ, 17 հոկտեմբերի – Sputnik. Մարդու ուղեղը երեսուն տարեկանում կարող է վաղաժամ ծերանալ, որի պատճառով հիշողությունը կվատանա, իսկ աշխատանքի արդյունավետությունը կնվազի։ Թե ինչպես կանխել ուղեղի վաղաժամ ծերացումը, Sputnik ռադիոյին տված հարցազրույցում պատմել է հոգեբան, «Նեյրոֆիտնես» կենտրոնի ղեկավար Վյաչեսլավ Լեբեդևը։
Լեբեդևի խոսքով`տարիքի հետ մարդիկ սկսում են ավելի վատ հիշել նոր տեղեկատվությունը, նրանց համար դժվար է աշխատել խիստ ծանրաբեռնված գրաֆիկով: Դա կարող է պայմանավորված լինել ճանաչողական խանգարումների հետ, որոնք անմիջապես կապված են ուղեղի ծերացման հետ։ Ընդ որում, երբեմն այնպիսի ախտանիշներ, ինչպիսիք են հիշողության վատթարացումը և աշխատունակության նվազումը, ի հայտ են գալիս բավական երիտասարդների մոտ։
«Լինում է, որ նման խնդիրներ առաջանում են ոչ թե մեծ տարիքում, այլ բավականին երիտասարդ ժամանակ։ Օրինակ, մինչև երեսուն տարեկան մարդը հաղթահարել է մի շարք խնդիրներ, աշխատանքի հետ կապված պատասխանել մեծ թվով նամակների և որոշ ժամանակ անց նա դժվարանում է կատարել այդ նույն աշխատանքը»,–նշել է հոգեբանը։
Լեբեդևը վստահ է, որ ճանաչողական խանգարումների զարգացումը հնարավոր է դանդաղեցնել առողջ ապրելակերպի միջոցով։
«Քունը, առողջ սնունդը և ֆիզիկական ակտիվությունը երեք հիմնական տարրերն են, որոնք անհրաժեշտ են խնդրից խուսափելու համար։ Եթե մենք վատ ենք սնվում կամ անկանոն քնում, կամ էլ քիչ ենք շարժվում, ապա ոչինչ չի աշխատի։ Դրանք երեք հիմնասյուներն են, որոնց վրա պահպանվում է մեր ճանաչողական առողջությունը»,— ընդգծել է Լեբեդևը։
Նա հավելել է, որ եթե լավ քունը, ճիշտ սնունդն ու սպորտով զբաղվելը չեն օգնում վերականգնել հիշողությունը, պետք է դիմել բժշկի: