Հայաստանի կողմի ներկայացված հայցում զետեղված պահանջների մի մասը կարող է բավարարվել, մի մասը` ոչ, բայց եթե դատարանը, թեկուզ մի փոքր մասն էլ բավարարելով, կայացնի որոշում, ապա կստացվի, որ գործի էության մասին է որոշում կայացնում։ Sputnik Արմենիայի հետ զրույցում նման տեսակետ հայտնեց փաստաբան Արա Ղազարյանը։
Նրա խոսքով` արդեն իսկ կա դրական հետևանք, որովհետև Բաքվում չարաբաստիկ ռազմավարի պուրակի մի մասն արդեն փակվել է։
«Իսկ մնացած ավարը ռազմական գործողությունների արգասիք է և կարող է միջազգային դատարանի կողմից ռասիզմի դրսևորում չհամարվել։ Հիմա մեր առաջնային խնդիրն է ռազմագերիների վերադարձը, և այդ գործընթացը կարող է որոշ մասով արագանալ։ Հնարավոր է, որ այս ընթացքում ադրբեջանցիները նաև ձեռնպահ մնան պատմամշակութային կոթողների ձևափոխումից, չասենք ոչնչացումից, մանավանդ որ ԵԽԽՎ–ն վերջերս իր բանաձևում առաջ քաշեց կեղծ ալբանական թեզը, ինչը նույնպես դատարանն անպայման հաշվի կառնի։ Հետևաբար մոտ ապագայում կայանալիք դատական ակտը որոշակի զսպողական ազդեցություն կունենա Ադրբեջանի վրա»,– նշեց փաստաբանը։
Ղազարյանի դիտարկմամբ` ՄԱԿ–ի միջազգային դատարանն ընդհանրապես առանձնահատուկ է նրանով, որ դրա որոշումները պետությունները երբեմն խուսանավում են կատարել` առաջ քաշելով տարբեր պատճառներ։ Այդ դատարանի որոշումների կատարման ընթացակարգերն այն աստիճանի հստակ չեն, ինչպես Եվրոպական դատարանի պարագայում, որովհետև վերջինիս դեպքում կա ամբողջական կառուցակարգ` նախարարների կոմիտեից մինչև վերահսկողություն։
«Առավել հետաքրքիրն այն է, որ ՄԱԿ–ի միջազգային դատարանի կայացրած որոշման դեպքում կունենանք պատմական փաստ, որի հիման վրա արդեն առավել մեծ ազդեցություն ունեցող միջազգային մարմիններն ու մանդատ ունեցող դերակատարները կարող են հղում անել դրան իրենց որոշումները կայացնելիս»,– նշեց փաստաբանը։
Ղազարյանի կարծիքով` հայցի մեջ ներկայացվել են բոլոր կարևոր կետերը, հայկական կողմի պահանջներն ավելի հիմնավոր են ու առարկայական, քան ադրբեջանցիներինը, որովհետև մենք խոսում ենք կոնկրետ պատերազմական հանցագործությունների մասին։
Հիշեցնենք՝ սեպտեմբերի 16 -ին Հայաստանը ՄԱԿ-ի Միջազգային դատարանում դատավարություն սկսեց Ադրբեջանի դեմ` «Ռասայական խտրականության բոլոր ձևերի վերացման միջազգային կոնվենցիայի» համաձայն: Հայցում նշվում է, որ «Ադրբեջանը տասնամյակներ շարունակ Հայաստանին ենթարկել է ռասայական խտրականության», որն արտահայտվել է, կոտորածներով, խոշտանգումներով և այլ խախտումներով:
Այդ խախտումները կրկին առաջին պլան են մղվել 2020 թվականի սեպտեմբերի հակամարտության ընթացքում, երբ ադրբեջանական կողմը դարձյալ կոնվենցիայի կոշտ խախտումներ է իրականացրել։
Ինչպես նշված է Հայաստանի կողմից ավելի վաղ ներկայացված հայցում, միջանկյալ միջոցների նպատակն է պաշտպանել և պահպանել Հայաստանի և հայերի իրավունքները հետագա ոտնձգություններից և կանխել վեճի սրումը՝ նախքան գործի վերաբերյալ ըստ էության որոշում կայացնելը, քանի որ հրատապ անհրաժեշտություն կա միջոցներ ձեռնարկել այդ իրավունքները պաշտպանելու համար: