Ընդդիմությունը ցանկանում էր վերցնել իշխանությունը, բայց չկարողացավ և հիմա պետք է հիմնավորի, թե որն է իր անելիքը խորհրդարանում և ընտրողներին համոզի, թե ինչու է մնում Ազգային ժողովում։ Հայաստանյան ներքաղաքական իրողությունների մասին Sputnik Արմենիայի հետ զրույցի ընթացքում նման կարծիք հայտնեց քաղաքագետ Ստեփան Դանիելյանը։
«Ամեն անգամ ցույց տալ, որ իշխանությունը վատն է, ինքնին հասկանալի է, սակայն պարզ չէ, թե որոնք են լինելու հաջորդ քայլերը։ Ընդդիմությունը հիմա ստագնացիայի և ինտելեկտուալ ճգնաժամի մեջ է, ինչը կարելի է ասել նաև գործող իշխանության մասին, որն իր հերթին չունի հանրային լայն աջակցություն` թեև վերջին ընտրություններում ձայների լավ տոկոս հավաքեց։ Բայց քանի որ տարածաշրջանում ընթանում են լուրջ պրոցեսներ և միջազգային գործընկերները պետք է ինչ-որ մեկի հետ խոսեն, հետևաբար իշխանությունը գոնե ֆորմալ առումով իր տեղում է»,– նշեց քաղաքագետը։
Դանիելյանի դիտարկմամբ` խոսել այն մասին, որ իշխանությունն ուժեղ է, իսկ ընդդիմությունը թույլ, ճիշտ չէ, քանզի բոլորն էլ թույլ են, բոլոր քաղաքական ուժերն այժմ գտնվում են մարգինալ վիճակում, ինչն իսկապես աննախադեպ իրավիճակ է։
Քաղաքագետի համոզմամբ` ներքաղաքական ճգնաժամից դուրս գալու ելքեր միշտ լինում են, բայց երևի հանրության գիտակից հատվածը պետք է կարողանա ճիշտ գնահատական տալ իրավիճակին` մատնանշելով ելքեր, կարողանա ստեղծել ինչ-որ քաղաքական միավոր և հանրության համար լինել վստահելի ուժ։ Իսկ նման միավոր ստեղծելու համար ժամանակ միշտ էլ կա։