ԵՐԵՎԱՆ, 14 հոկտեմբերի – Sputnik. ՀՀ կենտրոնական բանկի թողարկած հուշադրամներից երկուսը մրցանակների են արժանացել Ռուսաստանի Դաշնությունում անցկացված «Դրամների համաստեղություն-2021» 15-րդ միջազգային մրցույթում։ Տեղեկությունը հայտնում է ԿԲ հասարակայնության հետ կապերի ծառայությունը։
Ժանսեմ-100» ոսկե հուշադրամ
© Photo : Центальный Банк Армении
2020 թ․ թողարկված «Ժանսեմ-100» ոսկե հուշադրամը 3-րդ մրցանակի է արժանացել «Դասական հուշադրամ» անվանակարգում, իսկ «Սուրբ Էջմիածնի Մայր Տաճար» արծաթե հուշադրամը հաղթող է ճանաչվել «Հանդիսատեսի համակրանք» անվանակարգում:
«Սուրբ Էջմիածնի Մայր Տաճար» արծաթե հուշադրամ
© Photo : Центальный Банк Армении
«Դրամների համաստեղություն-2021» մրցույթին մասնակցելու հայտով դիմել էր 31 կազմակերպություն 22 երկրից՝ ներկայացնելով 2020 թ. թողարկված 220 հուշադրամ։
«Ժանսեմ-100» ոսկե հուշադրամի էսքիզների հեղինակն է Էդուարդ Կուրղինյանը:
«Սուրբ Էջմիածնի Մայր Տաճար» արծաթե հուշադրամի նախագծի հեղինակն է «CIT Coin Invest AG» ընկերությունը: Հուշադրամի էսքիզները պատրաստվել են Սուրեն Սիմոնյանի և Արամ Ուռուտյանի անմիջական ներգրավվածությամբ։ Հուշադրամն ուղեկցող բուկլետի տեքստերի կազմման աշխատանքներում աջակցություն է ցուցաբերել Մայր աթոռ Սուրբ Էջմիածինը։