ԵՐԵՎԱՆ,11 հոկտեմբերի – Sputnik. ՅՈՒՆԵՍԿՕ-ի հովանու ներքո Ճարտարապետության և շինարարության Հայաստանի ազգային համալսարանի հիմքի վրա կբացվի ճարտարապետության հուշարձանների վերականգնման և պահպանման ամբիոն: Այս մասին լրագրողների հետ զրույցում ասաց Ճարտարապետության և շինարարության Հայաստանի ազգային համալսարանի ռեկտոր Եղիազար Վարդանյանը։ Նա մասնակցում է «Պատմամշակութային ժառանգության պահպանումը որպես պետությունների միջև արդյունավետ երկխոսության միջոց» թեմայով միջազգային համաժողովին։
Վարդանյանը նշեց, որ այդ հարցով առայժմ բանավոր պայմանավորվածություն է ձեռք բերվել, որևէ փաստաթուղթ չի ստորագրվել:
«Ամենայն հավանականությամբ` ամբիոնը կսկսի գործել 2022 թվականին, առայժմ բանավոր պայմանավորվածություններ կան։ Ամբիոնի հիմքի վրա աշխատանքներ են տարվելու ճարտարապետական ժառանգության վերականգնման ուղղությամբ, մշակվելու է ուսումնական ծրագիր և այլն»,- ասաց նա։
Վարդանյանը տեղեկացրել է, որ պատմամշակութային ժառանգության պահպանման շրջանակում բուհի մասնագետները կատարել են Արցախի մշակույթի և ճարտարապետության 12 հուշարձանների եռաչափ մոդելավորում, ֆոտոգրամետրիա և սքանավորում։
Վարդանյանի խոսքով՝ նախարարության ներկայացրած ցանկում ընդգրկված են նաև այն հուշարձանները, որոնք նոյեմբերի 9-ից հետո մնացել են Ադրբեջանի վերահսկողության տակ գտնվող տարածքներում:
Ինչ վերաբերում է բուն համաժողովին, Վարդանյանը նշեց, որ այն պետք է տեղի ունենար դեռևս 2020թ․-ին, սակայն համավարակի պատճառով տեղափոխվել է մինչև 2021 թ․-ը: Ճարտարապետական համալսարանի ռեկտորը կարևոր է համարում նման հարթակները, հատկապես Արցախի հայկական ժառանգության հանրահռչակման, ինչպես նաև դրան սպառնացող խնդիրների արծարծման գործում։
«Գիտաժողովի աշխատանքների ավարտից հետո կընդունվի ամփոփիչ հռչակագիր։ Մենք արդեն քննարկել ենք դրույթները։ Փաստաթուղթը, մասնավորապես, գիտաժողովի մասնակիցներին պարտավորեցնելու է համապատասխան աշխատանք տանել ոչնչացման վտանգի տակ գտնվող մշակութային հուշարձանների պահպանության ուղղությամբ»,-ասել է Վարդանյանը։
Գիտաժողովին մասնակցում են առաջատար մասնագետներ Ռուսաստանից, Ղազախստանից, Բելգիայից, Իտալիայից, Իսպանիայից, Ֆրանսիայից, Գերմանիայից, Վրաստանից, Հայաստանից: