ԵՐԵՎԱՆ, 9 հոկտեմբերի - Sputnik. Կոնգոյի Դեմոկրատական Հանրապետության հյուսիս–արևմուտքում ինքնաշեն նավ է խորտակվել, ինչի հետևանքով ավելի քան 100 մարդ է տուժել։ Ըստ «France press» գործակալության` տեղեկությունը հայտնել է Կոնգոյի իշխանությունը:
Դեպքը տեղի է ունեցել երեկ` հոկտեմբերի 8-ին։ Գետից 51 մարմին են դուրս բերել, ևս 69-ը համարվում են անհետ կորած:
Մոնգալայի նահանգապետի մամուլի քարտուղար Նեստոր Մագբադոն գործակալությանն ասել է, որ 39 մարդ է փրկվել:
Նրա խոսքով՝ ուղևորների ցուցակ չկա, այդ պատճառով անհետ կորածների թիվը հիմնված է նավում տեղավորվող անձանց քանակով:
Մագբադոն հավելել է, որ հնարավոր է` խորտակման պատճառը եղանակի վատթարացումն է եղել։
Նահանգի իշխանությունները հոկտեմբերի 11-ից եռօրյա սուգ են հայտարարել։