2020 թվականի Արցախյան 44-օրյա պատերազմից հետո առաջին անգամ` 2021 թ.–ի հոկտեմբերի 10-ին, Արցախում ընտրություններ կանցկացվեն: Այս մասին հայտնում է Արցախի հանրային հեռուստատեսությունը:
«Արցախի 4 համայնքում այսօր լռության օր է: Հոկտեմբերի 10-ին Ասկերանի շրջանի Խաչմաչ ու Ծաղկաշատ, Մարտունու շրջանի Հերհեր և Մարտակերտի շրջանի Նոր Ղազանչի համայնքներում կանցկացվեն տեղական ինքնակառավարման մարմինների հերթական ընտրությունները»,- նշում են ԱՀ հանրային հեռուստատեսությունից:
Հիշեցնենք` 2020թ.–ի սեպտեմբերի 27-ի վաղ առավոտյան Ադրբեջանը Թուրքիայի աջակցությամբ լայնածավալ ռազմական հարձակում սկսեց արցախա–ադրբեջանական սահմանի ողջ երկայնքով։
2020թ.–ի նոյեմբերի 9-ին ՌԴ նախագահ Վլադիմիր Պուտինը, ՀՀ վարչապետ Նիկոլ Փաշինյանը և Ադրբեջանի նախագահ Իլհամ Ալիևը համատեղ հայտարարություն ընդունեցին ռազմական գործողությունների դադարեցման վերաբերյալ։
Եռակողմ հայտարարության համաձայն` Լեռնային Ղարաբաղի շփման գծի և Լաչինի միջանցքի երկայնքով տեղակայվեց Ռուսաստանի Դաշնության խաղաղապահ զորակազմը ՝ 1960 զինծառայողներով, հրաձգային զենքով, 90 զրահամեքենաներով, 380 միավոր ավտոմոբիլային և հատուկ տեխնիկայով:
Ռուսաստանի Դաշնության խաղաղապահ զորակազմը տեղակայվել է 5 տարի ժամկետով, որից հետո այդ ժամանակահատվածը մեխանիկորեն կերկարաձգվի ևս 5 տարով, եթե կողմերից որևէ մեկը ժամկետի ավարտից 6 ամիս առաջ չհայտարարի տվյալ դրույթի կիրառումը դադարեցնելու մտադրության մասին: