ՀՀ ֆինանսների նախարար Տիգրան Խաչատրյանը նոր պաշտոնը ստանձնելուց հետո մինչ հաջորդ տարվա բյուջեի մշակումը շուրջ 1 ամիս ժամանակ է ունեցել, ինչպես ինքն է ասում, իրավիճակը գնահատելու և հասկանալու համար։
Բացի այդ, թե՛ պաշտոնը ստանձնելուն նախորդած օրերին, թե՛ դրանից հետո ֆինանսների նոր նախարարը ժամանակ առ ժամանակ դիմել է արդեն նախկին նախարար Ատոմ Ջանջուղազյանին։
«Երբ որ հարցեր են առաջացել, պարոն Ջանջուղազյանի աջակցությունը միշտ առկա է եղել, քննարկել ենք, խորհրդակցել, առանձին հարցերի վերաբերյալ ընդհանուր տեսակետներ ենք ունեցել»,– Sputnik Արմենիային ասաց Խաչատրյանը։
Անդրադառնալով կառավարության կողմից արդեն հաստատված 2022թ–ի բյուջեի նախագծին` ֆինանսների նախարարը հիշեցրեց, որ այն 2021թ–ի արտահերթ ընտրությունների արդյունքում ձևավորված կառավարության գործունեության 5-ամյա ծրագրի առաջին տարվա բյուջեն է։ Այս տեսակետից Խաչատրյանը հաջորդ տարվա ֆինանսական փաստաթուղթը բնորոշեց իբրև «մեկնարկային»։
«Իր բովանդակությամբ ուղիղ կապված լինելով կառավարության ծրագրի գերակայությունների հետ և արտացոլելով այն քաղաքականությունը, որը կառավարությունը հայտարարել է իր գործունեության ծրագրով` այն կարելի է հենց այդ ծրագրի իրականացման մեկնարկի բյուջե համարել,– ասաց նախարարը,– թե՛ սոցիալական, թե ՛ կրթական ծրագրերի, թե՛ ենթակառուցվածքների զարգացման ուղղություններով մենք նախանշել ենք այն ուղղությունները, որով առաջիկա տարիներին ավելի ակտիվ ենք լինելու, և սա կարող ենք համարել մեկնարկի բյուջե»։
Հարցազրույցում նախարարն անդրադարձել է նաև 2022թ–ի հունվարի 1-ից ավելացող սոցիալական հատկացումումներին, պետական ապարատի` հաջորդ տարի նախատեսված ծախսերին, այդ թվում` հավելավճարների ու պարգևավճարների խնդրին, պատասխանել հանրությանը հուզող մի շարք այլ հարցերի։