ԵՐԵՎԱՆ, 7 հոկտեմբերի – Sputnik. ՀՀ Սյունիքի մարզի Քաջարան համայնքի ղեկավար Մանվել Փարամազյանի լիազորությունները չեն կասեցվել։ Տեղեկությունը Facebook-ի իր էջում հայտնել է Փարամազյանի պաշտպան Երվանդ Վարոսյանը։
«Երևան քաղաքի ընդհանուր իրավասության դատարանը, նախագահությամբ դատավոր Արմինե Մելիքսեթյանի, մերժեց ՀՀ ԱԱԾ քննչական դեպարտամենտի քննիչի միջնորդությունը` Քաջարան համայնքի ղեկավար Մանվել Փարամազյանի լիազորությունները կասեցնելու որոշման իրավաչափությունը հաստատելու մասին, և վերացրեց Մանվել Փարամազյանի լիազորությունները կասեցնելու մասին որոշումը»,-նշել է պաշտպանը։
Նրա խոսքով՝ այս անգամ Արմինե Մելիքսեթյանն իրականացրել է արդարադատություն։
Նշենք, որ սեպտեմբերի 1-ին Երևան քաղաքի ընդհանուր իրավասության դատարանի որոշմամբ երկու ամսով երկարաձգվել էր Սյունիքի մարզի Քաջարան համայնքի ղեկավար Մանվել Փարամազյանին կալանքի տակ պահելու ժամկետը։
Նրան մեղադրանք է առաջադրվել ՀՀ քրեական օրենսգրքի 38-178-րդ հոդվածի (խարդախության օժանդակելը կամ կազմակերպելը), 311-րդ հոդվածի (կաշառք ստանալը) և 154.2-րդ հոդվածի (ընտրողներին կաշառք տալը, կաշառք ստանալը, ընտրությունների ժամանակ բարեգործության արգելքի խախտումը կամ ընտրողի ազատ կամքի իրականացմանը խոչընդոտելը) հատկանիշներով։
Փարամազյանն առաջադրված մեղադրանքները չի ընդունում. գտնում է, որ այս ամենն իր նկատմամբ սկսված քաղաքական հետապնդման շղթայի մի մասն է: