Ղարաբաղում տեղակայված խաղաղապահները բարեգործական հիմնադրամներից մեկի ներկայացուցիչների հետ համատեղ կազմակերպել ու մարդասիրական ակցիա են անցկացրել Ստեփանակերտի գիշերօթիկ դպրոցի սաներին օգնություն ցուցաբերելու համար։ Տեղեկությունը հայտնում է ՌԴ ՊՆ մամուլի ծառայությունը:
Ռուսական խաղաղապահ զորախմբի ներկայացուցիչ Սերգեյ Վլադիմիրովի խոսքով՝ երեխաներին կոշիկներ ու գրենական պիտույքներ են նվիրել։
«Մարդասիրական օգնությունը տրամադրել են բարեգործական կազմակերպությունները, ռուսական խաղաղապահ ուժերը Ստեփանակերտ են բերել», - ասել է Վլադիմիրովը:
Գիշերօթիկ դպրոցում ծնողազուրկ կամ առանց ծնողական խնամքի մնացած 19 երեխա կա:
Դպրոցի երեխաներն ու դաստիարակները շնորհակալություն են հայտնել ռուսական խաղաղապահ զորախմբի հումանիտար արձագանքման կենտրոնի մասնագետներին և բարեգործական հիմնադրամի ներկայացուցիչներին։
Բարեգործական կազմակերպության ներկայացուցիչ Ալեսյա Պոդոլսկայան ռուսական խաղաղապահ ուժերին շնորհակալություն է հայտնել համատեղ գործունեության համար և խոսել համագործակցությունը շարունակելու մտադրության մասին: