ԵՐԵՎԱՆ, 6 հոկտեմբերի – Sputnik. ՀՀ առողջապահության նախարարությունը որոշել է` գործատուին ՊՇՌ թեստի պատասխան կամ էլ պատվաստման հավաստագիր պետք է ներկայացնել մինչև հոկտեմբերի 14-ը, որպեսզի լաբորատորիաների վրա եղած ծանրաբեռնվածությունը որոշակիորեն թուլանա։ Sputnik Արմենիայի հետ զրույցում հայտնեց առողջապահության նախարարի առաջին տեղակալ Լենա Նանուշյանը` պատասխանելով հարցին, թե ինչո՞ւ մարդիկ նախապես տեղյակ չէին, որ թեստի պատասխանի պահանջը պետք է ներկայացնել ոչ թե հոկտեմբերի 1-ին, այլ մինչև 14-ը։
Նշենք, որ հոկտեմբերի 1-ից ուժի մեջ է մտել առողջապահության նախարար Անահիտ Ավանեսյանի հրամանը, ըստ որի` աշխատողը գործատուին ՊՇՌ թեստի պատասխան կամ էլ 14 օրը մեկ պատվաստման հավաստագիր պետք է ներկայացնի։ Հոկտեմբերի 1-ից 1-2 օր առաջ պարզվեց` թեստի պատասխան կարելի է ներկայացնել մինչև հոկտեմբերի 14-ը, սակայն շատերն արդեն իսկ թեստավորվել էին, և մարդիկ վրդովվեցին, թե ինչու տեղեկացված չեն եղել այդ մասին։
«Ի դեպ, նախարարի հրամանը ոչ թե պարտադիր պատվաստման մասին է, այլ 14 օրը մեկ պարտադիր ՊՇՌ թեստ հանձնելու։ Որևէ մեկի թեստի պատասխանը չի կորչում, ուղղակի պետք է թեստ հանձնելուց 14 օր հետո կրկին թեստավորվել։ Նման կարգավորում է սահմանվել, որպեսզի կարողանանք անվտանգ աշխատանքային միջավայր ապահովել»,–ասաց Նանուշյանը։
Իսկ ինչ վերաբերում է պատվաստումներին, ապա, ըստ պաշտոնյայի, մինչ այսօր կես միլիոն պատվաստում է արվել ՀՀ–ում, մեծամասնությունն «AstraZeneca»-ով են պատվաստվել։
«Կորոնավիրուսի հետևանքով օրական ավելի քան 20 մարդ է մահանում։ Մեկ ամսվա ընթացքում պատկերացնո՞ւմ եք` որքան մահվան դեպք է գրանցվում կորոնավիրուսի հետևանքով։ Եվ Հայաստանը դեռ ամենաքիչ պատվասում անող երկրների շարքում է»,–հավելեց Նանուշյանը։
Հիշեցնենք, որ Հայաստանում կորոնավիրուսով վարակվածների թիվը վերջին մեկ օրում ավելացել է 1155-ով և դարձել 267 363: