ԵՐԵՎԱՆ, 30 սեպտեմբերի – Sputnik. ՀՀ կառավարությունն այսօրվա նիստում հաստատեց սահմանամերձ տարածաշրջանների զարգացման 2022 թվականի ծրագիրը, որի նպատակն, ըստ հեղինակների` սահմանամերձ համայնքների բնակիչների առօրյա հոգսերը հնարավորինս մեղմելն ու կենսապայմանները բարելավելն է։
Ծրագրով նախատեսվում է մասնակի փոխհատուցել սահմանամերձ համայնքների բնակիչների սպառած գազի, էլեկտրաէներգիայի, ոռոգման ջրի վարձավճարները և ամբողջապես փոխհատուցել անշարժ գույքի հարկը։
Այդ նպատակով 2022թ–ի բյուջեով կհատկացվի 1 155 205 800 դրամ։ Աջակցություն կստանան սահմանամերձ 23 համայնք ու 81 բնակավայր։
Սահմանամերձ տարածաշրջանների զարգացման ծրագիրն ամենամյա է։ Դրանով ամեն տարի սահմանվում է Հայաստանի Հանրապետության սահմանամերձ համայնքներին տրվող սոցիալական աջակցության փոխհատուցման ենթակա ծավալները, փոխհատուցման կարգն ու փոխհատուցում ստացող սահմանամերձ համայնքների ցանկը:
Սահմանամերձ տարածաշրջանների զարգացման առաջին ծրագիրը կառավարությունը հաստատել է 2014 թվականին։