ԵՐԵՎԱՆ, 22 սեպտեմբերի – Sputnik. Անկարան մոտ 300 միավոր մարտական մեքենա և 4000 զինծառայող է տեղափոխել Սիրիայի հյուսիս։ Սիրիական հողերում թուրքական ստորաբաժանումների ընդհանուր թիվը կես տարվա ընթացքում գրեթե կրկնակի ավելացել է, հայտնում է avia.pro կայքը։
Թուրքիան, լրացուցիչ զորք տեղափոխելով, սկսել է նախապատրաստվել Իդլիբում սիրիական և ռուսական զինված ուժերի հետ հնարավոր հակամարտությանը։ Տեղեկությունը հաստատում է «Bloomberg» գործակալությունը` հղում անելով թուրքական կառավարության աղբյուրին։
Թուրքիայի իշխանությունը չի կատարում ՌԴ–ի հետ ձեռք բերած պայմանավորվածությունները։ Համաձայնագրի մեջ նշվում էր, որ Անկարան սիրիական կառավարական բանակին պետք է փոխանցի M4 ավտոճանապարհից հարավ ընկած շրջանը, իսկ մայրուղին պետք է դառնար ռուսական զորքերի պատասխանատվության գոտի։ Մասնագետները կարծում են, որ հենց դա է պատճառը, որ Ռուսաստանը որոշել է մաքրել Իդլիբի հարավային շրջանը զինյալներից, ինչն ակնհայտորեն ձեռք չի տալիս Թուրքիային։