ԵՐԵՎԱՆ, 22 սեպտեմբերի - Sputnik. Գեղամասար համայնքի խոշորացման ծրագիրը համայնքի ղեկավար Հակոբ Ավետյանը համարում է միտումնավոր, քաղաքական ենթատեքստ ունեցող որոշում։ Համայնքի ղեկավարը նման տեսակետ հնչեցրեց այսօր ԱԺ ամբիոնից «Հայաստանի Հանրապետության վարչատարածքային բաժանման մասին» օրենքում փոփոխությունների նախագծի շուրջ խորհրդարանական լսումների ժամանակ։
«Դա առաջացել է այն ժամանակ, երբ ես խորհրդարանական ընտրությունների ժամանակ ունեցել եմ իմ քաղաքական հայացքը, սատարել եմ «Հայաստան» դաշինքին»,– ասաց Ավետյանը։
Բանն այն է, որ Գեղամասարն արդեն իսկ խոշորացված համայնք է։ 2017թ–ին մեկ համայնքի մեջ են ներառվել հարակից 18 գյուղեր։ Օրենքի նոր նախագծով կառավարությունն առաջարկում է մարզի սահմանամերձ բոլոր 36 համայնքները ներառել մեկում, որի կենտրոնը պետք է դառնա Վարդենիս քաղաքը։
Քաղաքական ենթատեքստից զատ, Հակոբ Ավետյանը համայնքի խոշորացման առաջարկվող մոդելում նաև վտանգներ է նկատում։
«Գեղամասար համայնքը փռված է սահմանի փեշով, ունի 80 կմ սահմանային գիծ։ Այդ գյուղերն ունեն բազմաթիվ խնդիրներ` և՛ անվտանգության առումով, և՛ տնտեսական։ Այդ խնդիրներին տիրապետելու, առկա վտանգը զգալու համար մարդը պետք է ապրի Կութ, Նորաբակ, Սոթք կամ այլ սահմանամերձ գյուղերում»,– ասաց Ավետյանը։
Նա նաև հայտարարեց, որ առաջարկվող խոշորացման սցենարը չի քննարկվել ո՛չ համայնքների ղեկավարների, ո՛չ համայնքի բնակիչների հետ։
Ավետյանը հայտնեց, որ մարդիկ մոտալուտ վտանգը զգալով` արդեն սկսել են արտագաղթել, ինչը ոչ միայն համայնքի, այլև պետության համար լուրջ անվտանգային խնդիր է առաջացնում։
Բացի այդ, Ավետյանի խոսքով, երբ ժամանակին միավորվել են 18 գյուղերը, դրան եղել են հավասարազոր համայնքներ, մինչդեռ անհավասար համայնքների միավորումը կարող է անհավասար մրցակցության խնդիրներ առաջացնել։
Նշենք, որ Գեղամասար համայնքում այսօր ներառված են 18 գյուղեր` Ազատ, Ավազան, Արեգունի, Արփունք, Գեղամաբակ, Գեղամասար, Դարանակ, Կախակն, Կութ, Կուտական, Նորաբակ, Շատջրեք, Շատվան, Ջաղացաձոր, Սոթք, Տրետուք, Փամբակ և Փոքր Մասրիկ։ Համայնքի կենտրոնը Սոթքն է։
Կառավարության առաջարկած օրենքի փոփոխությամբ այս գյուղերին կմիանան մարզի ևս 28 համայնքներ` Ախպրաձոր, Ակունք, Այրք, Գեղաքար, Զառիվեր, Լճավան, Լուսակունք, Խաչաղբյուր, Ծովակ, Կարճաղբյուր, Մաքենիս, Մեծ Մասրիկ, Ներքին Շորժա, Նորակերտ, Վանևան, Վերին Շորժա, Տորֆավան գյուղերը և Վարդենիս համայնքը, որն էլ կլինի նոր խոշորացված համայնքի կենտրոնը։
Նշենք, որ Հայաստանում վարչատարածքային նոր բաժանման արդյունքում կլինեն 78 համայնքներ։
Հիշեցնենք` 2021 թվականի սեպտեմբերի 24-ին` ժամը 11:00-ին, ՀՀ կառավարության նախաձեռնությամբ կգումարվի Ազգային ժողովի արտահերթ նիստ, որի ընթացքում կքննարկվի «Հայաստանի Հանրապետության վարչատարածքային բաժանման մասին» օրենքում փոփոխություններ և լրացումներ կատարելու մասին նախագիծը` առաջին և երկրորդ ընթերցմամբ։
Նորաստեղծ համայնքներում օրենքի փոփոխությունների հաստատումից հետո կնշանակվեն համայնքի ավագանու նոր արտահերթ ընտրություններ։
ԿԸՀ որոշմամբ` այս տարի ՏԻՄ ընտրություններ կանցկացվեն հոկտեմբերի 17-ին, նոյեմբերի 14-ին ու դեկտեմբերի 5-ին։