ԵՐԵՎԱՆ, 21 սեպտեմբերի – Sputnik. Ոստիկանները Եռաբլուր զինվորական պանթեոնից հեռացրին զոհված զինծառայող Լևոն Գալստյանի հորը՝ Արմեն Գալստյանին:
Հայտնել էինք, որ երկրի առաջին դեմքերը Եռաբլուրում են` հարգելու 44-օրյա պատերազմում զոհվածների հիշատակը։ Մասնավորապես, Եռաբլուր են այցելել ինչպես ՀՀ նախագահ Արմեն Սարգսյանը, այնպես էլ վարչապետ Նիկոլ Փաշինյանը, պաշտպանության նախարար Վաղարշակ Հարությունյանը, ԱԽ քարտուղար Արմեն Գրիգորյանը։
Զոհված զինծառայողի հայրը լրագրողների հետ զրույցում նշում էր, որ չի ուզում Փաշինյանն այցելի իր որդու գերեզմանին։
«Փաշինյանն անկոչ հյուր է այստեղ, ես չեմ ուզում` գա իմ երեխու տուն. Եռաբլուրն իմ երեխու տունն է»,–ասաց Արմեն Գալստյանը։
Մինչ հայրը պատմում էր որդու պատմությունը, այդ ժամանակ արդեն իսկ պաշտոնյաները Եռաբլուր եկան։ Զոհվածի հորը ոստիկանները հեռացրին տարածքից։
Զոհված զինծառայող Զաքար Ավանեսյանի մայրն էլ լրագրողների հետ զրույցում նշեց, որ մայրերը սգի մեջ են, իսկ հրապարակում գունագեղ համերգ են պատրաստվում անել։
«Ես ինքս չեմ գնալու այդ համերգին»,–ասաց կինը
Հավելենք, որ լրագրողներին թույլ չեն տալիս առաջանալ և հարցեր ուղղել պաշտոնյաներին:
Հիշեցնենք` Հայաստանի Անկախության հռչակագիրն ընդունվել է 1991թ. օգոստոսի 23-ին՝ Հայաստանի Գերագույն Խորհրդի առաջին նստաշրջանում: Այնուհետև խորհրդարանի որոշմամբ 1991թ. սեպտեմբերի 21-ին անցկացվեց ԽՍՀՄ կազմից դուրս գալու և անկախ պետականություն հռչակելու մասին հանրաքվե՝ խորհրդային ընտրական օրենսգրքով։
30 տարի առաջ այս օրը՝ սեպտեմբերի 21-ին, Խորհրդային Հայաստանի չափահաս բնակչության բացարձակ մեծամասնությունը՝ 94․99 տոկոսը, «այո» ասաց անկախությանը։
Արդեն սեպտեմբերի 23-ին Գերագույն խորհուրդը Հայաստանը հռչակեց անկախ և ինքնիշխան պետություն:
Անկախության հանրաքվեի արդյունքները հրապարակել է Բաբկեն Արարքցյանը, ՀՀ անկախության մասին Հայաստանի ԳԽ-ի որոշումն ընթերցել է պատգամավոր Արամ Մանուկյանը, Ամենայն հայոց կաթողիկոս Վազգեն առաջինն էլ օրհնել է քաղաքացիների՝ անկախ երկիր ունենալու որոշումը: