ԵՐԵՎԱՆ, 21 սեպտեմբերի – Sputnik. ՀՀ կառավարության գործունեության ծրագրում նշված է, որ Հայաստանն իր օրակարգ է մտցնում խաղաղության հարցը։ Իսկ խաղաղության օրակարգի քննարկումը անցկացնելու ենք ոչ թե Եթովպիայի կամ Հարավային Կորեայի, այլ հարևան երկրների հետ։ Եռաբլուրում լրագրողների հետ զրույցում նման կարծիք հայտնեց ՔՊ–ական պատգամավոր Գուրգեն Արսենյանը` անդրադառնալով Փաշինյան–Էրդողան «երկպոսության» զարգացումներին։
Նշենք, որ Թուրքիայի նախագահ Ռեջեփ Թայիփ Էրդողանը հայտարարել էր, թե վարչապետ Նիկոլ Փաշինյանը Վրաստանի վարչապետ Իրակլի Ղարիբաշվիլի միջոցով իրեն հանդիպման առաջարկ է արել:
Դրանից հետո վարչապետի մամուլի խոսնակ Մանե Գևորգյանն էլ հայտնել էր` այս պահի դրությամբ Հայաստանի և Թուրքիայի պաշտոնյաների միջև որևէ շփում տեղի չի ունեցել, չնայած ՀՀ կառավարությունը պատրաստ է նման շփումների։
«Խաղաղության օրակարգի փաստաթղթային մասից նաև որոշակի քայլեր են բխում, որոնց էլ պետք է գնան իրավասու մարմինները` ելնելով ՀՀ շահերից։ Ինչ վերաբերում է Փաշինյանի խոսքին, թե Թուրքիայի կողմից դրական ազդակներ կան, ապա Թուրքիայի կողմից արված հայտարարությունների տոնը և բովանդակությունը լրիվ այլ է, քան մեկ տարի առաջ»–ասաց Արսենյանը։
Հարցին, թե Էրդողանը դրական քայլերի ակնկալիք ունի ՀՀ–ից, ինչի՞ մասին կարող է խոսք լինել, Արենյանը պատասխանեց, որ արդեն իսկ դրական քայլն արված է` կառավարության ծրագրում ընդգրկվել է խաղաղության օրակարգը։
Հիշեցնենք, որ կառավարության 5-ամյա ծրագիրն արդեն իսկ հաստատել է Ազգային ժողովը։
Կառավարության առաջիկա 5 տարիների ծրագրի մեջ նշված է, որ ՀՀ–ն պատրաստակամ է ջանքեր գործադրել Թուրքիայի հետ հարաբերությունների կարգավորման ուղղությամբ։
Մասնավորապես, ասվում էր, որ Հայաստանի և Թուրքիայի միջև դիվանագիտական հարաբերությունների բացակայությունը, փակ սահմանները, ինչպես նաև 44-օրյա պատերազմում Թուրքիայի բացահայտ ներգրավվածությունը բացասական ազդեցություն են ունենում տարածաշրջանի խաղաղության և կայուն զարգացման վրա։
Հայաստանը մշտապես պատրաստ է եղել Թուրքիայի հետ առանց նախապայմանների հարաբերությունների կարգավորմանը։