ԵՐԵՎԱՆ, 21 սեպտեմբերի – Sputnik. ԵԿՄ–ն հիմա երիտասարդներով է համալրվում, որպեսզի եթե ՀՀ պետական սահմանի դեմ ոտնձգություն լինի, ԵԿՄ–ն կանգնի հայոց բանակի կողքին։ Եռաբլուրում լրագրողների հետ զրույցում այս մասին ասաց ԵԿՄ նախագահ Սասուն Միքայելյանը։
ԵԿՄ–ականներն այս պահին Եռաբլուրում են պատերազմում զոհվածների հիշատակը հարգելու նպատակով։
«ՀՀ սահմանի նկատմամբ ոտնձգություններ կան և կլինեն` ծանր վիճակի մեջ ենք մենք հիմա։ Սակայն այսօր մենք, մեր պետությունն ու զինված ուժերն այն վիճակում չեն, որ կարողանան զենքի կամ ուժի միջոցով ինչ-որ բանի հասնել։ Բայց դա չի էլ նշանակում, որ Ադրբեջանն ինչ ասի` պետք է սուսուփուս անել, ինչի համար էլ երկրապահները քայլեր են անում հիմա. հզորանում ենք»,–ասաց Միքայելյանը։
Լրագրողները հետաքրքրվեցին, թե ի՞նչ կարող է ասել նրանց մասին, ովքեր սկսել են սպարապետ Վազգեն Սարգսյանին քննադատել, մասնավորապես, ՔՊ-ական պատգամավոր Խաչատուր Սուքիասյանին։ Ի պատասխան Միքայելյանը նշեց, որ Խաչատուր Սուքիասյանը շատ փոքր մարդ է, որ Վազգեն Սարգսյանին քննադատի։ Միքայելյանի խոսքով` մարդ պետք է իր անցած ուղուն հետ հայացք գցի և նոր խոսի մյուսների մասին։
«Վազգեն Սարգսյանն այն մարդն էր, որ կարողացավ շատերին համախմբել և 8000 քմ տարածք ազատագրել։ Ես կարծում եմ, որ մեր հույսը չպետք է կորցնենք և մի օր գնանք նորից այն տարածքներ, որն ազատագրել է հենց Վազգեն Սարգսյանը»,–ասաց Միքայելյանը` հավելելով, որ Սարգսյանի օրոք տարածաշրջանում ամենահզոր բանակն ունեինք։
Հիշեցնենք, որ Ազգային ժողովում կառավարության ծրագրի քննարկման ժամանակ իր ելույթով հանրության ու տեղեկատվական դաշտի ուշադրության կենտրոնում հայտնվեց իշխանական պատգամավոր Խաչատուր Սուքիասյանը։
Վերջինս, ի թիվս այլոց, ԱԺ ամբիոնից, ապա նաև լրագրողների հետ ճեպազրույցում լուրջ մեղադրանքներ հնչեցրեց նաև Վազգեն Սարգսյանի հասցեին՝ նրան բացահայտ մեղադրելով պետական հեղաշրջման, ինչպես նաև բանակը քաղաքականության մեջ ներգրավելու մեջ։